KiMEDIA

លោក សម រង្ស៊ី ថា​គណបក្ស​សង្គ្រោះ​ជាតិ​នឹង​ឈ្នះ​ឆ្នោត​នៅ​ពេល​ខាង​មុខ​នេះ

ទីក្រុង​ប៉ារីស ប្រទេស​បារាំង នៅ​ថ្ងៃ​ទី​១៥ ខែ​មេសា ឆ្នាំ​២០១៧។ Photo courtesy of Sam Rainsy facebook

ដោយ ឡេង ម៉ាលី RFA 2017-04-16

អតីត​ប្រធាន​គណបក្ស​សង្គ្រោះ​ជាតិ គឺ​លោក សម រង្ស៊ី ថ្លែង​ដោយ​សង្ឃឹម​ថា គណបក្ស​សង្គ្រោះ​ជាតិ នឹង​ឈ្នះ​ឆ្នោត​លើសលប់​នៅ​ពេល​ខាង​មុខ​នេះ។ សេចក្ដី​ថ្លែងការណ៍​របស់​លោក គឺ​ក្នុង​កិច្ច​ពិភាក្សា​លក្ខណៈ​រង្វង់​គ្រួសារ​ខ្មែរ​មួយ​នៅ​ជិត​ទីក្រុង​ប៉ារីស ស្ដីពី​ការ​វិវឌ្ឍន៍​នយោបាយ​នៅ​ប្រទេស​កម្ពុជា ក្នុង​ឆ្នាំ​២០១៧ និង​ឆ្នាំ​២០១៨។

លោក សម រង្ស៊ី ថ្លែង​ក្នុង​វីដេអូ​តាម​ទំព័រ​ហ្វេសប៊ុក (facebook) របស់​លោក ក្នុង​កិច្ច​ពិភាក្សា​នោះ​កាល​ពី​ថ្ងៃ​ទី​១៥ មេសា ថា គណបក្ស​សង្គ្រោះ​ជាតិ នឹង​ឈ្នះ​ឆ្នោត​ភ្លូក​ទឹក​ភ្លូក​ដី​នៅ​ពេល​បោះឆ្នោត​ក្នុង​ឆ្នាំ​២០១៧ និង​ឆ្នាំ​២០១៨។

លោក សម រង្ស៊ី ថ្លែង​ដោយ​ក្ដី​សង្ឃឹម​បែប​នេះ ព្រោះ​លោក​យល់​ថា​មាន​សន្ទុះ​គាំទ្រ​ពី​អ្នក​នៅ​ក្នុង​ជួរ​គណបក្ស​កាន់​អំណាច ដែល​ពេល​នេះ​នៅ​សម្ងំ​សុខ រក្សា​តំណែង ការពារ​សុវត្ថិភាព​ខ្លួន មិន​ហ៊ាន​និយាយ​ស្ដី និង​មិន​ទាន់​ចាប់​គណបក្ស​សង្គ្រោះ​ជាតិ ដោយសារ​មិន​ទាន់​ឃើញ​ថា គណបក្ស​សង្គ្រោះ​ជាតិ ខ្លាំង៖ «ប៉ុន្តែ​ដល់​ពេល​បោះឆ្នោត​ឃុំ​ហើយ បោះឆ្នោត​ព្រឹទ្ធសភា​ហើយ ឃើញ​ថា​គណបក្ស​សង្គ្រោះ​ជាតិ នឹង​ឈ្នះ​ថ្នាក់​ជាតិ អា​ហ្នឹង​ឈ្នះ​ផ្ដាច់​ព្រ័ត្រ។ ពេល​ហ្នឹង​គេ​លែង​ហើយ គឺ​ខុស​គ្នា​តែ ៦​ខែ​ទេ គេ​នឹង​លែង​គណបក្ស​កាន់​អំណាច គេ​នឹង​មក​គាំទ្រ​គណបក្ស​សង្គ្រោះ​ជាតិ។ អ៊ីចឹង​ជ័យជម្នះ​ខែ​៧ បោះឆ្នោត​ជ្រើសរើស​តំណាងរាស្ត្រ​ថ្មី នាយក​រដ្ឋមន្ត្រី​ថ្មី គឺ​នឹង​ទទួល​ជ័យជម្នះ​ភ្លូក​ទឹក​ភ្លូក​ដី ជ័យជម្នះ​កាន់​តែ​ធំ​ឡើងៗ​អត់​មាន​ថយ​ក្រោយ​ទេ»។

ទន្ទឹម​គ្នា​នឹង​ក្ដី​សង្ឃឹម​នេះ ព្រោះ​លោក​ក្ដាប់​បាន​ព័ត៌មាន​ថា ការ​រៀបចំ​ការ​បោះឆ្នោត​ខាង​មុខ​នេះ នឹង​មិន​មាន​អ្វី​ជា​បញ្ហា​គ្រោះថ្នាក់​ទេ ហើយ​ការ​ប៉ុនប៉ង​លួច​ចូល​ទៅ​កែ​ឈ្មោះ ក៏​ធ្វើ​មិន​បាន​ដែរ។ ត្រង់​នេះ​ហើយ​ដែល​លោក​ជឿ​ថា ការ​បោះឆ្នោត​នៅ​ពាក់​កណ្ដាល​ឆ្នាំ​នេះ នឹង​ឆ្លុះ​បញ្ចាំង​ឆន្ទៈ​ប្រជារាស្ត្រ​ចាប់​ផ្ដើម​ផ្លាស់ប្ដូរ​នៅ​ថ្នាក់​មូលដ្ឋាន ដែល​ជឿ​ថា​គណបក្ស​លោក នឹង​មាន​មេ​ឃុំ​ចៅ​សង្កាត់​យ៉ាង​តិច​ពាក់​កណ្ដាល៖ «អ៊ីចឹង​ខ្ញុំ​និយាយ​អម្បាញ់មិញ​ថា គណបក្ស​សង្គ្រោះ​ជាតិ ទទួល​បាន​សំឡេង និង​តំណែង​ជា​សមាជិក​ក្រុម​ប្រឹក្សា​ឃុំ-សង្កាត់​ច្រើន​ជាង​គណបក្ស​គេ​មួយ​ទៀត ដូច្នេះ​អង្គ​បោះឆ្នោត​របស់​យើង គឺ​ច្រើន​ជាង​គណបក្ស​គេ​មួយ​ទៀត បោះឆ្នោត​ជ្រើសរើស​សមាជិក​ព្រឹទ្ធសភា។ អ៊ីចឹង​តំណែង​ព្រឹទ្ធសភា​នឹង​បាន​មក​គណបក្ស​សង្គ្រោះ​ជាតិ ច្រើន​លើសលប់​លើស​គណបក្ស​គេ​មួយ​ទៀត។ អ៊ីចឹង​យើង​ព្រឹទ្ធសភា​ច្រើន​ជាង​គណបក្ស​គេ​មួយ​ទៀត។ ដល់​ពេល​បោះឆ្នោត​ព្រឹទ្ធសភា​ហើយ ព្រឹទ្ធសភា​គេ​ប្រជុំ​ពេញ​អង្គ ដើម្បី​បោះឆ្នោត​រើស​ប្រធាន​ព្រឹទ្ធសភា។ អ៊ីចឹង​បើ​យើង​មាន​សមាជិក​ព្រឹទ្ធសភា​ច្រើន​ជាង​គេ គឺ​ប្រធាន​ព្រឹទ្ធសភា គឺ​មក​ពី​គណបក្ស​សង្គ្រោះ​ជាតិ។ អ៊ីចឹង​គឺ​លើក​ទី​មួយ​ហើយ ឆ្នាំ​២០១៧ បោះឆ្នោត​ថ្នាក់​មូលដ្ឋាន។ ដល់​ចូល​ដល់​ឆ្នាំ​២០១៨ ភ្លាម ខែ​១ គឺ​បោះឆ្នោត​ព្រឹទ្ធសភា គឺ​ថ្នាក់​ជាតិ គឺ​ស្ថាប័ន ហើយ​ស្ថាប័ន​ជាតិ​ដំបូង​ដែល​គណបក្ស​សង្គ្រោះ​ជាតិ ដឹកនាំ គឺ​ព្រឹទ្ធសភា ខែ​១ ឆ្នាំ​២០១៨។ ៦​ខែ​បន្ទាប់ គឺ​បោះឆ្នោត​ថ្នាក់​ជាតិ ខែ​៧ ឆ្នាំ​២០១៨»។

ទាក់ទង​នឹង​សេចក្ដី​ថ្លែងការណ៍​របស់​លោក សម រង្ស៊ី មន្ត្រី​នាំ​ពាក្យ​គណបក្ស​ប្រជាជន​កម្ពុជា លោក សុខ ឥសាន មាន​ប្រសាសន៍​ថា ជ័យជម្នះ​នេះ លោក សម រង្ស៊ី ថ្លែង ២៣​ឆ្នាំ​មក​ហើយ៖ «»។

ឆ្លើយតប​នឹង​សំណួរ​ថា តើ​សេចក្ដី​ថ្លែងការណ៍​នេះ​ធ្វើ​ឲ្យ​គណបក្ស​ប្រជាជន​កម្ពុជា ព្រួយ​បារម្ភ​ពី​ការ​បាត់បង់ ឬ​ថយ​សំឡេង​ឆ្នោត​គាំទ្រ​នៅ​ពេល​បោះឆ្នោត​ឬ​ទេ? លោក សុខ ឥសាន មាន​ប្រសាសន៍​ថា គណបក្ស​លោក​មិន​ភ្ញាក់​ផ្អើល​ទេ៖ «និយាយ​រួម គឺ​គណបក្ស​ប្រជាជន មិន​ឆាប់​រអើល​ទេ។ គ្រាន់​តែ​ឮ​មាន់​រត់​ប៉ះ​ប៉ោត​ធ្លាក់​ក្ដុងក្ដាំង ថា​គ្រាប់បែក​ដែរ គណបក្ស​ប្រជាជន មិន​ដែល​ផ្អើល​របៀប​អ៊ីចឹង​ទេ មាន​តែ​គណបក្ស​ផ្សេង​ទេ​ដែល​ផ្អើល»។

ប្រទេស​កម្ពុជា នឹង​រៀបចំ​ការ​បោះឆ្នោត​ជ្រើសរើស​ក្រុម​ប្រឹក្សា​ឃុំ-សង្កាត់​នៅ​ថ្ងៃ​ទី​៤ ខែ​មិថុនា ឆ្នាំ​២០១៧។ រហូត​មក​ដល់​ពេល​នេះ មាន​គណបក្ស​នយោបាយ​ចំនួន​១២ បាន​ចុះ​បញ្ជី​ចូលរួម​ប្រកួត​ប្រជែង​យក​សំឡេង​គាំទ្រ​នៅ​ក្នុង​ការ​បោះឆ្នោត​ឃុំ-សង្កាត់​នេះ៕

Source link

ទៅវត្តចូលឆ្នាំ ២០១៧

Source link

ពលរដ្ឋ​រាប់​ម៉ឺន​នាក់​សម្រុក​ចូល​កម្សាន្ត​នៅ​តំបន់​អង្គរ​ក្នុង​ពិធី​បុណ្យ​ចូល​ឆ្នាំ​ថ្ងៃ​ទី​៣

ពលរដ្ឋ​ទៅ​លេង​កម្សាន្ត​ក្នុង​ព្រឹត្តិការណ៍​អង្គរ​សង្ក្រាន្ត​នៃ​ពិធី​បុណ្យ​ចូល​ឆ្នាំ​នៅ​ខេត្ត​សៀមរាប ថ្ងៃ​ទី​១៦ ខែ​មេសា ឆ្នាំ​២០១៧។  RFA/Hang Savyouth

ដោយ ហង្ស សាវយុត RFA 2017-04-16

ថ្ងៃ​ទី​៣ នៃ​ពិធី​បុណ្យ​ចូល​ឆ្នាំ​ថ្មី​ប្រពៃណី​ជាតិ​នៅ​ឯ​តំបន់​អង្គរ​ក្នុង​ខេត្ត​សៀមរាប គឺ​មាន​ចំនួន​មនុស្ស​ច្រើន​ណែនណាន់​តាន់តាប់​សម្រុក​ចូល​ទៅ​កម្សាន្ត​នៅ​ទីនោះ។ ការ​ដែល​មហាជន​នាំ​គ្នា​សម្រុក​ទៅ​តំបន់​អង្គរ​ច្រើន​កុះករ​នេះ ដោយសារ​តែ​ព្រឹត្តិការណ៍​អង្គរ​សង្ក្រាន្ត​បាន​រៀបចំ​នៅ​ទីនោះ​មាន​លេង​ល្បែង​ប្រជាប្រិយ​ខ្មែរ​ជាច្រើន​ប្រភេទ ជា​ហេតុ​ទាក់ទាញ​ឲ្យ​ពួក​គេ​ចង់​ឃើញ និង​ចូលរួម​សប្បាយ។

មន្ត្រី​រៀបចំ​ព្រឹត្តិការណ៍​អង្គរ​សង្ក្រាន្ត​លើក​ទី​៥ នៅ​ខេត្ត​សៀមរាប អះអាង​ថា នៅ​ថ្ងៃ​ទី​៣ នៃ​ពិធី​បុណ្យ​ចូល​ឆ្នាំ​ខ្មែរ ត្រូវ​នឹង​ថ្ងៃ​អាទិត្យ ទី​១៦ ខែ​មេសា ថា​មិន​ត្រឹម​តែ​មាន​ប្រជាពលរដ្ឋ​ខ្មែរ​រាប់​ម៉ឺន​នាក់​ចាប់​អារម្មណ៍ ហើយ​សម្រុក​ចូល​ទៅ​កម្សាន្ត​សប្បាយ​ប៉ុណ្ណោះ​ទេ គឺ​ពលរដ្ឋ​មក​ពី​បណ្ដា​ប្រទេស​ជា​មិត្ត​ខ្លះ​ដូចជា​សាធារណរដ្ឋ​ប្រជាមានិត​ចិន ប្រទេស​រុស្ស៊ី និង​សមាគម​ប្រជាពលរដ្ឋ​នៃ​ប្រទេស​សិង្ហបុរី ក៏​បាន​អញ្ជើញ​ចូលរួម​ជា​ភ្ញៀវ​កិត្តិយស​ដែរ។

មន្ត្រី​រៀបចំ​ព្រឹត្តិការណ៍​អង្គរ​សង្ក្រាន្ត​លើក​ទី​៥ គឺ​លោក សោម រតនា។ លោក​មាន​ប្រសាសន៍​នៅ​ព្រឹក​ថ្ងៃ​អាទិត្យ ទី​១៦ ខែ​មេសា ថា ព្រឹត្តិការណ៍​អង្គរ​សង្ក្រាន្ត​លើក​ទី​៥ នៅ​តំបន់​អង្គរ​ខេត្ត​សៀមរាប នៅ​តែ​ទាក់ទាញ​ភ្ញៀវ​ទេសចរ​ជាតិ និង​អន្តរជាតិ​ឲ្យ​ចូលរួម​សប្បាយ​យ៉ាង​ច្រើន។ លោក សោម រតនា បញ្ជាក់​ថា ថ្ងៃ​អាទិត្យ ទី​១៦ ខែ​មេសា គឺ​ជា​ថ្ងៃ​ទី​៣ នៃ​ព្រឹត្តិការណ៍​អង្គរ​សង្ក្រាន្ត​ទៅ​ហើយ ក៏ប៉ុន្តែ​នៅ​តែ​មាន​មនុស្ស​រាប់​ម៉ឺន​នាក់​នាំ​គ្នា​ចូល​កម្សាន្ត និង​លេង​ល្បែង​ប្រជាប្រិយ​ជាច្រើន​ប្រភេទ និង​ការ​រាំ​លេង​សប្បាយ៖ «ឆ្នាំ​នេះ គឺ​យើង​ឃើញ​មាន​ភ្ញៀវ​ទេសចរ​ជាច្រើន​ដែរ ហើយ​យើង​ក៏​មាន​ប្រទេស​ជា​មិត្ត ដូចជា ចិន រុស្ស៊ី និង​សិង្ហបុរី ជាដើម បាន​បញ្ជូន​អ្នក​ចូលរួម​ពី​បណ្ដា​ប្រទេស​របស់​គាត់ មក​ចូលរួម​ដែរ»។

ព្រឹត្តិការណ៍​អង្គរ​សង្ក្រាន្ត​នៅ​តំបន់​អង្គរ​ឆ្នាំ​នេះ បាន​រៀបចំ​លេង​ល្បែង​ប្រជាប្រិយ​ខ្មែរ​ជាច្រើន ចាប់​តាំង​ពី​មុខ​ប្រាសាទ​អង្គរវត្ត រហូត​ទៅ​ដល់​តំបន់​អង្គរធំ។ ល្បែង​ប្រជាប្រិយ​ខ្មែរ​ទាំងនោះ​មាន​ល្បែង​ប្រកួត​អុក ឬ​ក៏​ក្រឡាចត្រង្គ ល្បែង​ទាញ​ព្រ័ត្រ ការ​រត់​ប្រណាំង​ច្រក​បាវ ការ​សម្ដែង​ក្បាច់​គុន​ល្បុក្កតោ និង​ការ​រាំ​លេង​កម្សាន្ត ជាដើម។

ក្រុម​យុវជន​លេង​ទាញ​ព្រ័ត្រ​ក្នុង​ព្រឹត្តិការណ៍​អង្គរ​សង្ក្រាន្ត​នៃ​ពិធី​បុណ្យ​ចូល​ឆ្នាំ​នៅ​ខេត្ត​សៀមរាប ថ្ងៃ​ទី​១៦ ខែ​មេសា ឆ្នាំ​២០១៧។ RFA/Hang Savyouth

មន្ត្រី​រៀបចំ​ព្រឹត្តិការណ៍​អង្គរ​សង្ក្រាន្ត ឲ្យ​ដឹង​ថា ឆ្នាំ​នេះ​ព្រឹត្តិការណ៍​អង្គរ​សង្ក្រាន្ត​មាន​លក្ខណៈ​ពិសេស​ជាង​ឆ្នាំ​មុនៗ ដោយ​មាន​រៀបចំ​ទាក់ទាញ​ទាំង​កុមារ​តូចៗ និង​មនុស្ស​ពេញ​វ័យ​ឲ្យ​ចូល​លេង​កម្សាន្ត ហើយ​ជាពិសេស គឺ​បាន​បង្ហាញ​ប្រវត្តិ ១០០​ឆ្នាំ​នៃ​របាំ​ព្រះរាជ​ទ្រព្យ​ខ្មែរ​ជា​ទិដ្ឋភាព​ថ្មី និង​មាន​ការ​ទាក់ទាញ​ខ្លាំង​ក្នុង​វិស័យ​វប្បធម៌។

ចាប់​តាំង​ពី​ម៉ោង ៨​ព្រឹក គឺ​មាន​មនុស្ស​កុះករ​បាន​ធ្វើ​ដំណើរ​តាម​រថយន្ត តាម​រ៉ឺម៉ក​ម៉ូតូ និង​តាម​ម៉ូតូ​ជាដើម សម្រុក​ចូល​ទៅ​កម្សាន្ត​នៅ​តាម​តំបន់​អង្គរ ជា​ហេតុ​ធ្វើ​ឲ្យ​ដង​ផ្លូវ​សំខាន់ៗ​ត្រូវ​កកស្ទះ​ចរាចរណ៍​ជា​អន្លើៗ។

ប្រជាពលរដ្ឋ​ជាច្រើន​បាន​បង្ហាញ​អារម្មណ៍​ប្រហាក់​ប្រហែល​គ្នា​ថា ពួក​គេ​រីករាយ​នៅ​ពេល​ដែល​បាន​មក​កម្សាន្ត​ព្រឹត្តិការណ៍​អង្គរ​សង្ក្រាន្ត​នៃ​ពិធី​បុណ្យ​ចូល​ឆ្នាំ​ថ្មី​នៅ​តំបន់​អង្គរ​នេះ។

កញ្ញា ស្រី​មុំ ជា​អ្នក​រស់នៅ​ខេត្ត​សៀមរាប មាន​ប្រសាសន៍​ថា នាង​បាន​មក​លេង​នៅ​មុខ​អង្គរវត្ត​ជាមួយ​នឹង​មិត្តភ័ក្ដិ។ នាង​បាន​ឃើញ​ព្រឹត្តិការណ៍​អង្គរ​សង្ក្រាន្ត​រៀបចំ​បង្ហាញ​ទស្សនីយភាព ព្រម​ទាំង​មាន​លេង​ល្បែង​ប្រជាប្រិយ​ជាច្រើន​នេះ ធ្វើ​ឲ្យ​នាង​ពេញ​ចិត្ត​យ៉ាង​ខ្លាំង៖ «ជូនពរ​ឲ្យ​ប្រជាពលរដ្ឋ​ខ្មែរ​ទាំងអស់​មាន​សុខភាព​ល្អ រក​ស៊ី​មាន​បាន ហើយ​ធ្វើ​ដំណើរ​ទៅ​ណា​មក​ណា​ជួប​តែ​សេចក្តី​សុខ​គ្រប់​គ្នា»។

អ្នកស្រី ស៊ឹង ផល្លា ដែល​នាំ​កូន​ប្រុស​ស្រី​ជាច្រើន​នាក់​ពី​ទីក្រុង​ភ្នំពេញ មាន​ប្រសាសន៍​ថា គាត់​បាន​ចាកចេញ​ពី​ផ្ទះ​រយៈពេល ៣​ថ្ងៃ​ហើយ ដើម្បី​កម្សាន្ត​នៅ​តំបន់​អង្គរ។ ស្ត្រី​ដដែល​បញ្ជាក់​ថា គាត់​ចូល​ចិត្ត​ពិធី​បុណ្យ​ចូល​ឆ្នាំ​ខ្មែរ​នៅ​ខេត្ត​សៀមរាប ទើប​រយៈពេល ៥​ឆ្នាំ​មក​នេះ គាត់​មិន​ដែល​ទៅ​កម្សាន្ត​នៅ​ខេត្ត​ផ្សេង​ទេ៖ «ពេល​មក​ដល់​ឃើញ​ទិដ្ឋភាព​នៅ​អង្គរ ដូចជា​ស្រស់ស្រាយ ឃើញ​ក្មេងៗ​លេង​សប្បាយ​ហាក់​ធ្វើ​ឲ្យ​អារម្មណ៍​របស់​ខ្ញុំ​ភ្លេច​អស់​ការ​នឿយ​ហត់»។

ចំណែក​អ្នកស្រី ហង្ស ណារី ជា​អ្នក​នៅ​ខេត្ត​សៀមរាប ម្នាក់​ទៀត​មាន​ប្រសាសន៍​ថា ជា​រៀង​រាល់​ថ្ងៃ អ្នកស្រី​តែង​ជាប់​រវល់​នឹង​ការងារ ទើប​តែ​ថ្ងៃ​នេះ​បាន​សម្រាក ក៏​ដើរ​លេង​តំបន់​អង្គរ​ជាមួយ​នឹង​គ្រួសារ។ អ្នកស្រី ណារី បង្ហាញ​អារម្មណ៍​រំភើប​នៅ​ពេល​ដែល​ឃើញ​ល្បែង​ប្រជាប្រិយ​ខ្មែរ​ជាច្រើន​ប្រភេទ ព្រម​ទាំង​នៅ​គ្រប់​ទីកន្លែង​មាន​មនុស្ស​កុះករ ព្រម​ទាំង​មាន​ការ​រាំ​លេង​កម្សាន្ត​ផង​នោះ៖ «យើង​ជា​ខ្មែរ ចាប់​អារម្មណ៍​ទាំងអស់​ប្រពៃណី​យើង មិន​អាច​ចោល​បាន​ទេ គឺ​សប្បាយ​ចិត្ត។ គេ​ក៏​ដើរ យើង​ក៏​ដើរ គឺ​សប្បាយ​ណាស់ ព្រោះ ១​ឆ្នាំ​មាន​តែ​ម្ដង»។

មន្ត្រី​ប៉ូលិស​នៃ​ស្នងការដ្ឋាន​នគរបាល​ខេត្ត​សៀមរាប លោក អ៊ួង សុផល មាន​ប្រសាសន៍​ថា ក្នុង​ពេល​ដែល​ចំនួន​មនុស្ស​ច្រើន​កុះករ​ចូល​មក​កម្សាន្ត​នៅ​តំបន់​អង្គរ​នេះ គឺ​កម្លាំង​សន្តិសុខ​បាន​ប្រុង​ប្រយ័ត្ន​យ៉ាង​ខ្លាំង ខ្លាច​ក្រែង​មាន​ជន​ខិលខូច​ឆ្លៀត​ឱកាស​លួច​ឆក់​ទ្រព្យ​សម្បត្តិ​របស់​ប្រជាពលរដ្ឋ​ដែល​កំពុង​តែ​ដើរ​កម្សាន្ត។ មន្ត្រី​សន្តិសុខ​ដដែល​បញ្ជាក់​ថា ក្នុង​រយៈពេល ៣​ថ្ងៃ​នេះ សន្តិសុខ​នៅ​តំបន់​អង្គរ​បាន​ធានា​ទាំងស្រុង មិន​មាន​អំពើ​លួច និង​ឆក់​ទេ ក៏ប៉ុន្តែ​មាន​បញ្ហា​ខ្លះ​បាន​កើត​ឡើង គឺ​ប្រជាពលរដ្ឋ​ខ្លះ​បាន​វង្វេង​គ្រួសារ ដោយសារ​តែ​ចំនួន​មនុស្ស​ច្រើន​ពេក។

ទោះ​ជា​យ៉ាង​ណា រហូត​មក​ដល់​ថ្ងៃ​ទី​៣ នៃ​ពិធី​បុណ្យ​ចូល​ឆ្នាំ​នៅ​អង្គរ​នេះ គឺ​ទាំង​អាជ្ញាធរ​ខេត្ត​សៀមរាប និង​មន្ត្រី​មន្ទីរ​ទេសចរណ៍ នៅ​មិន​ទាន់​អាច​សរុប​ចំនួន​អ្នក​ចូល​មក​កម្សាន្ត​ថា​ប៉ុន្មាន​ម៉ឺន​នាក់​ច្បាស់លាស់​នៅ​ឡើយ​ទេ ដោយ​អាជ្ញាធរ​បាន​ត្រឹម​តែ​ប្រកាស​ឲ្យ​កន្លែង​ផ្ញើ​ម៉ូតូ និង​រថយន្ត​ទាំងឡាយ កុំ​យក​ថ្លៃ​ផ្ញើ​យានយន្ត និង​លក់​ម្ហូប​អាហារ​ខ្ពស់​ហួសហេតុ​ពេក ក្នុង​ពេល​ដែល​ប្រជាពលរដ្ឋ​ជាច្រើន​មក​កម្សាន្ត​សប្បាយ​នេះ៕

Source link

លោក សម រង្ស៊ី ជឿជាក់ថា CNRP ​នឹង​ឈ្នះ​ឆ្នោត​ឃុំ​សង្កាត់ បាន​ច្រើន​លើសលុប!​

លោក សម រង្ស៊ី​ ដែល​កំពុង​ស្ថិតនៅ​ឯបរទេស​@Sam Rainsy Facebook

ដោយ ហេង ឧត្តម16/04/2017 rfi

អតីត​ប្រធាន​គណបក្សប្រឆាំង​ លោក សម រង្ស៊ី សង្ឃឹមថា បក្ស​សង្គ្រោះជាតិ​ នឹង​ឈ្នះការ​​ឆ្នោត​​ក្រុម​ប្រឹក្សាឃុំ​សង្កាត់ បាន​ច្រើន​លើសលុប នៅ​ពេល​ដ៏​ខ្លី​នេះ​ ហើយ​នឹង​កាន់​កាប់​ស្ថាប័ន​ព្រឹទ្ធសភា  ព្រម​ទាំង​​​ឈ្នះ​ការ​បោះ​ឆ្នោត​ជាតិ​ យ៉ាង​ភ្លូក​ទឹក​ភ្លូក​ដី​ថែមទៀត នៅ​ឆ្នាំ​ក្រោយ!​ លោក​​និយាយយ៉ាង​​ដូច្នេះ គឺនៅក្នុង​ពេល​ជួប​ជុំ​ពិភាក្សា​ជាមួយ​ពលរដ្ឋ​ខ្មែរ​នៅ​ប្រទេស​បារាំង​ ប្រមាណ​ជាង​២០នាក់ នៅ​ជាយ​ក្រុង​ប៉ារីស កាលពី​ម្សិលមិញ​។

​នៅក្នុង​វីដេអូ​ រយៈ​ពេល​ប្រមាណជាង​​៥នាទី លោក សម រង្ស៊ី អតីត​ប្រធាន​គណបក្ស​សង្គ្រោះ​ជាតិ​ ពាក់​អាវធំ​ពណ៌ខ្មៅ គ្មាន​ក្រវាត់​ក កំពុង​ឈរ​និយាយ នៅ​ចំពោះ​មុខ​អ្ន​កស្តាប់ ​ភាគ​ច្រើន​ សុទ្ធតែជា​មនុស្ស​ធំ ​ចាស់ៗ ដែលអ្នក​ខ្លះ កំពុង​​កាន់​កាំមេរ៉ាថត ​អ្នក​ខ្លះ​ឈរ ខ្លះ​​អង្គុយ​ នៅ​ជុំវិញ​តុ​បាយ​។

ដោយ​មាន​ភរិយា​អង្គុយ​នៅ​ខាង​ស្តាំដៃផង លោក សម រង្ស៊ី ឈរ​ថ្លែង​ក្តីសង្ឃឹមថា បក្ស​សង្គ្រោះជាតិ​​ នឹង​ឈ្នះ​បាន​ចំនួន​សមាជិក​ក្រុម​ប្រឹក្សា​ឃុំ​សង្កាត់ បាន​ច្រើន​លើសលប់ ហើយ​ក្រោយ​មក នឹង​ឈាន​ទៅ​កាន់​កាប់​ស្ថាប័ន​​​ព្រឹទ្ធសភា ដែល​ជា​ស្ថាប័ន​​ជាតិ។ រួម​មកទៀត​ គណ​​បក្ស​ប្រឆាំង នឹង​ឈ្នះ​ភ្លូក​ទឹក​ភ្លូក​ដី​ ថែមទៀត ការ​បោះឆ្នោត​ជាតិ​នៅ​ឆ្នាំក្រោយ។​

លោក សម រង្ស៊ី ពន្យល់ថា បើបក្ស​សង្គ្រោះជាតិ ឈ្នះ​បាន​ចំនួន​សមាជិក​​ក្រុម​ប្រឹក្សា​ឃុំ​សង្កាត់​ច្រើន​លើសលប់ នោះ​នៅពេល​បោះឆ្នោត​ជ្រើសរើស​ប្រធាន​ព្រឹទ្ធសភា គឺ​តំណែង​នេះ នឹង​បាន​ទៅ​បក្ស​ប្រឆាំង។ ដូច្នេះ​បក្ស​ប្រឆាំង​កាន់កាប់​ស្ថាប័ន​ជាតិ​មួយដ៏សំខាន់។ ពេល​នោះ​ហើយ ដែល​ពលរដ្ឋ​និង​សមាជិក​បក្ស​កាន់អំណាច​ផង នឹង​ងាក​​រេ​បែរ​ចិត្ត​ទៅគាំទ្រ​បក្ស​សង្គ្រោះជាតិ​កាន់តែ​ច្រើន ហើយ​នឹង​ឈ្នះ​ឆ្នោត​ជាតិ​តែម្តង នៅ​ពាក់​កណ្តាល​ឆ្នាំ២០១៨។​

ភ្លាមៗ លោក សុខ ឥសាន អ្នក​នាំពាក្យ​បក្ស​កាន់​អំណាច​ ប្រតិកម្មឆ្លើយ​តប​ប្រាប់វិទ្យុ​បារាំងRFI ថា គ្មាន​អ្វី​ចម្លែក​នោះឡើយ​ ដែល​លោក សម រង្ស៊ី កំពុង​តែ​យល់​សប្តិ ហើយ​ក្តី​​សុបិន​នេះ ក៏​​គ្មាន​ថ្ងៃ​នឹង​ក្លាយ​ជាការ​ពិត​ឡើយ។ លោក សម រង្ស៊ី ចេះតែ​ដេក​ស្រមៃ​បែប​នេះ តាំង​​ពី​១៩៩៥មក​ម្ល៉េះ គឺជាង​២០ឆ្នាំហើយ​ លោក​​ស្រមៃ​តាំងពី​នៅជា​ប្រធាន​គណបក្ស​ រហូត​ដល់អស់គ្មាន​សល់អ្វី ​នៅតែដៃ​ទទេ។​ ដូច្នេះ ចំពោះ​លោក សុខ ឥសាន គឺ​គ្មាន​ចាប់​អារម្មណ៍​អ្វីបន្តិចទេ ចំពោះ​ការ​ប្រកាស​របស់​លោក សម រង្ស៊ី។​

យ៉ាងណា​ក៏ដោយ ការ​បញ្ជាក់​សេចក្តី​សង្ឃឹម​ថា​ឈ្នះ​ឆ្នោត​របស់​អតីត​ប្រធាន​គណបក្ស​សង្គ្រោះជាតិ​យ៉ាង​ដូច្នេះ គឺ​ដោយសារតែ​លោក សម រង្ស៊ី​ ​ មាន​ជំនឿ​យ៉ាង​ខ្លាំង​ទៅ​លើការ​រៀបចំបញ្ជី​ឈ្មោះ​​​បោះឆ្នោត​របស់​ គ.ជ.ប.។ លោក សម រង្ស៊ី​ ថា​ បើ​ទោះបី​ជាមាន​ការ​ប៉ុន​ប៉ង​ចូល​បំផ្លាញ​ទិន្នន័យ​នៅក្នុង​គេហទំព័រ​គ.ជ.ប.ក្តី​ តែមិន​បាន​សម្រេច។

ជាមួយ​គ្នា​នេះ លោក ហង្ស ពុទ្ធា​ អ្ន​កនាំពាក្យ​គណកម្មាធិការ​ជាតិ​រៀបចំ​ការ​បោះឆ្នោត អះ​អាង​ដែរ​ថា ​ពិត​ជា​អ៊ីចឹង​មែន!​ ​ទិន្នន័យបញ្ជីឈ្មោះ​របស់​អ្នក​ចុះឈ្មោះ​បោះឆ្នោត គឺបាន​​រក្សា​ទុក​បាន​ល្អ មាន​សុវត្ថិភាព បើ​ទោះបីជា​មាន​ជន​ទុច្ចរិត ព្យាយាម​ចូលទៅ​បំផ្លាញ​ម្តង​ជា​ពីរ​ដង​ក្តី​​។ តាម​បញ្ជាក់របស់អ្ន​កនាំពាក្យគ.ជ.ប., ការ​ប្រកាស​​ពី​លទ្ធផល​ឈ្នះ ឬចាញ់ នៅពេល​នេះ គឺ​គ្រាន់តែ​ជា​វោហាសាស្ត្រ​របស់​អ្នក​នយោបាយ​តែប៉ុណ្ណោះ គឺវា​អាច​ត្រូវ​ ឬ​ខុស ព្រោះ​លទ្ធផល​​ជាក់​ស្ដែង​នៅ​មិនទាន់​មាននៅឡើយ។

ក៏​ប៉ុន្តែ លោក ហង្ស ពុទ្ធា បាន​សង្កត់​ធ្ងន់​ថា គ.ជ.ប. ហាម​ដាច់​ខាត ការ​ប្រកាស​លទ្ធផល​បោះ​ឆ្នោត ឬ​ការ​ស្ទង់​មតិ ថា​ឈ្នះឬចាញ់ នៅ​ពេល​១សប្តាហ៍មុន​ការ​បោះឆ្នោត!​​ បើពុំ​ដូច្នេះទេ​ គឺនឹង​ត្រូវប្រឈម​មុខ​ចំពោះ​មុខ​ច្បាប់៕

Source link

Source of Khmer Genocide

By Narith Tieng




Source link

kethyasean « នរណាជាឃាតករសម្លាប់ប៉ាខ្ញុំ »by kethya

#facebookethyasean ១៦ ០៤​ ២០១៧
🙂សួស្តីប្រិយមិត្តជាទីរាប់អាន!!!🙂
សូនជូនអត្ថបទសង្ខេបស្តីអំពី
« នរណាជាឃាតករសម្លាប់ប៉ាខ្ញុំ »
នឹងប្រវត្តិសង្ខេបពីកុមារភាពរបស់នាងខ្ញំុ
ព្រមទាំងប្រវត្តិឈឺចាប់របស់ប្រជាពលរដ្ឋខ្មែរក្នុងរបបវាលពិឃាតខ្មែរក្រហម
១៩៧៥-២០១៧ ៤២ឆ្នាំបានកន្លងផុតទៅហើយ។
រៀបរៀងនិងអធិប្បាយដោយនាងខ្ញុំស៊ានកេត្យា
សូមចូលរួមចុចស្តាប់នូវការអធិប្បាយរបស់នាងខ្ញុំដោយមេត្រី😭😭


Source link