ព័ត៌មានខ្មែរ

IMF៖ ​ប្រាក់ខែ​ខ្ពស់​និង​ចំណាយ​ច្រើន​ធ្វើ​ឱ្យ​កម្ពុជា​មាន​ឱនភាព​ជិត​៤ភាគរយ​ធៀប​នឹង​GDP


សេដ្ឋកិច្ច​ប្រទេស​កម្ពុជា​ នឹង​មាន​ការ​រីកចម្រើន​បន្ត​ទៀត​ក្នុង​រង្វង់​៧ភាគរយ​នៅ​ឆ្នាំ​២០១៧និង​២០១៨ ​ប៉ុន្តែ​ការ​ចំណាយ​សាធាិរណៈ​ជាពិសេស​លើ​ប្រាក់ខែ​ខ្ពស់​សម្រាប់​មន្ត្រី​រាជការ​មិនមាន​សមាមាត្រ​ជាមួយ​នឹង​ការ​រីកចម្រើន​នេះ​ទេ​ ហើយ​នឹង​នាំ​ឱ្យ​មាន​ឱនភាព​សារពើ​ពន្ធ​ជិត​៤​ភាគ​រយនៅ​ឆ្នាំ​នេះ។ នេះ​បើ​តាម​ការ​វាយ​តម្លៃ​របស់​មូលនិធិ​រូបិយវត្ថុ​អន្តរជាតិ​កាលពី​ថ្ងៃ​អង្គារ។

ប្រតិភូ​របស់​មូលនិធិ​រូបិយវត្ថុ​អន្តរជាតិ​(IMF) ដឹកនាំ​ដោយ​លោក​ Jarkko Turunen ​ដែល​ទៅ​ពី​រដ្ឋ​ធានី​វ៉ាស៊ីនតោន​ បាន​ជួប​ពិភាក្សា​ជាមួយ​នឹង​មន្ត្រី​កម្ពុជា​ពីថ្ងៃទី​១២ដល់​២៥ ខែ​កក្កដា​ឆ្នាំ​នេះ​នៅ​រាជធានី​ភ្នំពេញ​ និង​ក្រុង​ព្រះសីហនុ។

លោក​ Turunen ​បាន​បញ្ជាក់​នៅក្នុង​សេចក្តី​ថ្លែងការណ៍​ នៅពេល​បញ្ចប់​បេសកកម្ម​នេះ​ថា៖

«ប្រទេស​កម្ពុជា​បន្ត​រីកចម្រើន​ក្នុង​ជំហាន​មួយ​គួរ​ឱ្យ​ស្ងើច​សរសើរ។ សកម្មភាព​សេដ្ឋកិច្ច​បន្ត​ខ្លាំង​ក្នុង​ឆ្នាំ​២០១៦ ​ក្នុង​ខណៈ​ពេល​ដែល​អតិផរណា​ឡើង​ដល់​៣ភាគរយ ដោយសារ​តែ​តម្លៃ​ម្អូប​អាហារ ​និង​ប្រេង​ឡើង​ខ្ពស់​ជាង​មុន‍»។

​IMF ​មើលឃើញ​ថា​ កត្តា​ដែល​ជំរុញ​កំណើន​សេដ្ឋកិច្ច​កម្ពុជា​បាន​មក​ពី​ការ​វិនិយោគ​វិស័យ​ឯកជន វិស័យ​សំណង់​ដែល​កើនឡើង​យ៉ាង​ខ្លាំង​ និង​សកម្មភាព​ទេសចរណ៍។

IMF ​បញ្ជាក់​ថា​ បើ​ទោះបីជា​កម្ពុជា​មាន​ការ​រីកចម្រើន​រហ័ស​ក្នុង​រយៈពេល​បីទសវត្សរ៍​កន្លង​មក​នេះ​ ដោយសារតែ​មាន​បរិយាកាស​ស្ថិរភាព​ម៉ាក្រូសេដ្ឋកិច្ច ​ទីផ្សារ​សេរី​ និង​ស្ថិត​នៅលើ​ក្នុង​តំបន់​ដែល​មាន​សេដ្ឋកិច្ច​រីកចម្រើន​រហ័ស​របស់​ពិភពលោក​ ក៏ប៉ុន្តែ​កម្ពុជានៅ​តែ​ប្រឈម​មុខ​នឹង​បញ្ហា​ប្រឈម​ខាង​រចនាសម្ព័ន្ធ ​ដែល​មាន​ដូច​ជា​មូលដ្ឋាន​សេដ្ឋកិច្ច​ចង្អៀត ​បរិយាកាស​សេដ្ឋកិច្ច​ខ្សោយ ​និង​ទីផ្សារ​ហិរញ្ញវត្ថុ​មិន​ទាន់​មានការ​អភិវឌ្ឍ​ល្អ។

​ការ​គ្រប់គ្រង​សារពើពន្ធ​ដោយ​ប្រយ័ត្ន​ប្រយែង​ក្នុង​រយៈពេល​ប៉ុន្មាន​ឆ្នាំ​ចុងក្រោយ​នេះ​បាន​ជួយ​រក្សា​លំនឹង​ឱនភាព​ថវិកា​ និង​បំណុល​សាធារណៈ​ឱ្យ​នៅ​កម្រិត​ទាប។ ការ​អនុវត្ត​យុទ្ធសាស្រ្ត​ប្រមូលពន្ធ​របស់​រដ្ឋាភិបាល​ រួមគ្នា​ជាមួយ​នឹង​កំណើន​សេដ្ឋកិច្ច​ដ៏ខ្លាំង​នេះ​បាន​នាំ​ឱ្យ​ការ​ប្រមូលពន្ធ​កើនឡើង​រហូត​ដល់​១៥ភាគរយ​នៃ​ផលិត​ផល​សរុប​ក្នុងស្រុក ​(GDP)។ ប៉ុន្តែ​ IMF ​ព្រមាន​ថា​ឱនភាព​សារពើពន្ធ​នៅ​ក្នុង​ឆ្នាំ​នេះ​អាច​នឹង​មាន​គម្លាត​រហូតដល់​៣,៧​ភាគរយ​ ប្រៀបធៀប​នឹង​ផលិតផល​សរុប​ក្នុង​ស្រុក​ដោយសារតែ​ការ​បើក​ប្រាក់ខែ​មន្ត្រីរាជការ​ច្រើន ​និង​ការ​ចំណាយ​ផ្សេងៗ​ទៀត​នាពេល​បច្ចុប្បន្ន។

លោក​ Trurunen ​បាន​បន្ថែម​ថា៖

«ដូច្នេះ​ហើយ​ត្រូវ​ដាក់​ចេញ​នូវ​វិធានការ​បន្ថែម​ជាចាំបាច់​ ដើម្បី​រក្សា​ចីរភាព​សារពើពន្ធ​និង​សម្រេច​បាន​ការ​ចំណាយ​រួម​ដែល​សមាមាត្រ​គ្នា​ជាមួយ​នឹង​ការរីកចម្រើន​ និង​ការ​អភិវឌ្ឍ។ ជាពិសេស​យើង​មើល​ឃើញ​នូវ​តម្រូវការ​ក្នុងការ​ទប់ទល់​នឹង​ឱនភាព​សារពើពន្ធ​ក្នុង​រយៈពេល​ដ៏ខ្លី​ខាងមុខ​នេះ​ ពង្រឹង​គោលនយោបាយ​និង​រដ្ឋបាល​ពន្ធដា ផ្តល់​អាទិភាព​លើ​ការ​ចំណាយ​ដែល​គាំទ្រ​ដល់​ការអភិវឌ្ឍ ​និង​ធានា​ថា​ការ​ដំឡើង​ប្រាក់​ខែ​មន្ត្រីរាជការ​នៅតែ​មាន​ចីរភាព​ ទន្ទឹមគ្នា​នឹង​ការ​រីកចម្រើន​បន្ថែម​ទៀត​នៃ​កំណែ​ទម្រង់​សាធារណៈ‍»។

រដ្ឋាភិបាល​កម្ពុជា​ប្រមូល​ចំណូល​ពន្ធ​បង់​ចូល​ថវិកា​ជាតិ​បាន​ចំនួន​ ១,១៩២​លាន​ដុល្លារ​អាមេរិក​ នៅ​ឆមាសទី១ ​ឆ្នាំ​២០១៧​នេះ ​គឺ​កើនឡើង​៣២,១៤ភាគរយ ​បើធៀប​នឹង​រយៈពេល​ដូចគ្នា​ក្នុង​ឆ្នាំ​២០១៦។ នេះ​បើតាម​របាយការណ៍​របស់​អគ្គនាយដ្ឋាន​ពន្ធដារ​នៃ​ក្រសួង​សេដ្ឋកិច្ច​និង​ហិរញ្ញវត្ថុ។

រដ្ឋាភិបាល​បាន​ដំឡើង​ប្រាក់​ខែ​ដល់​មន្ត្រី​រាជការ​យ៉ាង​ច្រើន​ក្នុង​រយៈពេល​ប៉ុន្មាន​ឆ្នាំ​ចុងក្រោយ​នេះ​ ជាពិសេស​នៅ​ក្រោយ​ពីការ​បោះឆ្នោត​ជា​តិឆ្នាំ​២០១៣​ ដែល​គណបក្ស​ប្រជាជន​កម្ពុជា​បាន​ឈ្នះ​ដោយ​ប្រផិត​ប្រផើយ។

IMF ​ក៏​បាន​ស្នើ​ឱ្យ​អាជ្ញាធរ​កម្ពុជា​បន្ត​ចាត់​វិធានការ​ធ្វើ​ឱ្យ​ប្រសើរ​ឡើង​ដល់​ភាព​រឹងមាំ និង​ដោះស្រាយ​ភាព​ងាយ​រងគ្រោះ​នៃ​វិស័យ​ហិរញ្ញ​វត្ថុ​ដែល​បាន​ឡើងខ្ពស់​ ក្នុង​នោះ​មាន​ដូចជា​ការ​គ្រប់គ្រង​ហានិភ័យ​ឥណទាន​ឱ្យ​បាន​ប្រសើរ​ឡើង​ ដាក់​ឱ្យ​ប្រើប្រាស់​នូវ​គោលនយោបាយ​ធានា​រ៉ាប់រង​កម្រិត​ខ្ពស់ បង្កើត​នូវ​ក្របខណ្ឌ​គ្រប់គ្រង​គ្រោះអាសន្ន និង​បង្កើន​និយ័តកម្ម​នៃ​ស្ថាប័ន​ហិរញ្ញវត្ថុ​ដែល​មិនមែន​ជា​ធនាគារ‍៕

Source link

បទល្មើស​ដឹកជញ្ជូន​ឈើ​និង​ស្តុក​ឈើ​ក្នុងស្រុក​កូន​មុំ ខេត្តរតនគិរី សមត្ថកិច្ច​បង្ក្រាប​មិនចេះ​អស់​

​ប្រជាពលរដ្ឋ​នៅ​ឃុំ​ត្រពាំង​ក្រហម ស្រុក​កូន​មុំ ខេត្តរតនគិរី បាន​ឲ្យ​ដឹងថា​បទល្មើស​ស្តុក​ឈើ​និង​ដឹកជញ្ជូន​ឈើ​ឆ្លងកាត់​មូលដ្ឋាន​របស់​ពួកគាត់​នៅតែ​បន្ត​កើតមាន​យ៉ាង​ពេញបន្ទុក ព្រោះ​មន្ត្រី​ជំនាញ​និង​សមត្ថកិច្ច​ពាក់ព័ន្ធ​គ្មាន​ឆន្ទៈ​ក្នុងការ​បង្ក្រាប​បទល្មើស​ព្រៃឈើ​ប្រកបដោយ​ប្រសិទ្ធិភាព​ឡើយ​។ ជាក់ស្ដែង​ករណី​សមត្ថកិច្ច​បង្ក្រាប​ទីតាំង​ស្តុក​ឈើ​នៅក្នុង​ភូមិ​២ ឃុំ​ត្រពាំង​ក្រហម កាលពី​ព្រឹក​ថ្ងៃទី​២៤ ខែកក្កដា ឆ្នាំ​២០១៧ គឺធ្វើឡើង​ទាំង​ទើសទាល់​ព្រោះ​សមត្ថកិច្ច​ពុំមាន​ឆន្ទៈ​ក្នុងការ​បង្ក្រាប​នោះទេ​។ ចំណែក​លោក កែប កត់ នាយ​ខណ្ឌ​រដ្ឋបាល​ព្រៃឈើ​ខេត្តរតនគិរី បាន​រក្សា​ភាព​ស្ងៀមស្ងាត់​ក្នុងខណៈដែល​បទល្មើស​កា​ប់​ឈើ ស្តុក​ឈើ និង​ដឹកជញ្ជូន​ឈើ​ខុសច្បាប់​ក្នុងស្រុក​កូន​មុំ នៅតែ​កើតឡើង​យ៉ាង​ពេញបន្ទុក​។

សូមបញ្ជាក់ថា​កាលពី​ព្រឹក​ថ្ងៃទី​២៤ ខែកក្កដា ឆ្នាំ​២០១៧ សមត្ថកិច្ច​ចម្រុះ​បាន​ចុះទៅ​បង្ក្រាប​ទីតាំង​ស្តុក​ឈើ​ប្រណីត​ជាង​២​តោន​របស់​ឈ្មួញ​នៅ​ចំណុច​ខាងកើត​សាលាបឋមសិក្សា​ត្រពាំង​ក្រហម​ក្នុងភូមិ​២ ឃុំ​ត្រពាំង​ក្រហម ស្រុក​កូន​មុំ​។ ប្រភពពី​សមត្ថកិច្ច​ដែល​ចូលរួម​ក្នុងការ​បង្ក្រាបបាន​ឲ្យ​ដឹងថា ឈើ​ប្រណីត​ទាំងនោះ​ជា​របស់​ឈ្មោះ គឿន ដែលជា​ឈ្មួញ​លក់​សាច់ជ្រូក​នៅ​ផ្សារ​ត្រពាំង​ក្រហម ហើយ​ជា​ឈ្មួញ​ឈើ​ដ៏​ល្បីល្បាញ​ប្រចាំ​ឃុំ​ត្រពាំង​ក្រហម​តែម្តង​។ ឈ្មួញ​ឈើ​ឈ្មោះ គឿន ដែលមាន​របរ​លក់​សាច់​ជ្រូក​ផង​នោះ តែង​យកឈ្មោះ​និង​អំណាច​សមត្ថកិច្ច​ពាក់ព័ន្ធ​ក្នុង​មូលដ្ឋាន​មកប្រើប្រាស់​ដើម្បី​ប្រមូល​ទិញ​ឈើ​និង​ស្តុក​ឈើ​ខុសច្បាប់​ដោយ​គ្មាន​ញញើត​អ្វី​ទាំងអស់​។

​មាន​សេចក្ដីរាយការណ៍​ខ្លះ​បាន​ឲ្យ​ដឹងថា នាយ​ប៉ុស្ដិ៍នគរបាលរ​ដ្ឋ​បាល​ឃុំ​ត្រពាំង​ក្រហម ឈ្មោះ ប៉ាក ពៅ ក៏ដូចជា​អធិការនគរបាល​ស្រុក​កូន​មុំ លោក ភោគ បូរិទ្ធ ទំនងជា​ទទួលបាន​ផលប្រយោជន៍​ពី​ឈ្មួញ​ទើប​កន្លងមក​នាំគ្នា​រក្សា​ភាព​ស្ងៀមស្ងាត់​ទុក​ឲ្យ​ឈ្មួញ​ឈ្មោះ គឿន ធ្វើ​អ្វីៗ​តាម​អំពើ​ចិត្ត​។ ជាងនេះទៅទៀត​ទំនងជា​សមត្ថកិច្ច​ក្នុង​មូលដ្ឋាន​ជូនដំណឹង​ទៅ​ម្ចាស់​ទីតាំង​ស្តុក​ឈើ​ជាមុន ទើប​នៅ​យប់​ថ្ងៃទី​២៣ ខែកក្កដា ឆ្នាំ​២០១៧ ឈ្មួញ​ឈ្មោះ គឿន ដឹកជញ្ជូន​ឈើ​ចេញ​អស់​មួយផ្នែកធំ​មុនពេល​សមត្ថកិច្ច​បង្ក្រាប​នៅ​ព្រឹក​ថ្ងៃទី​២៤ ខែកក្កដា ឆ្នាំ​២០១៧​។ ប្រការ​នេះហើយ​ទើប​ប្រជាពលរដ្ឋ​គ្មាន​ជំនឿ​លើ​មន្ត្រី​ជំនាញ​និង​សមត្ថកិច្ច​ពាក់ព័ន្ធ​ក្នុងការ​បង្ក្រាប​បទល្មើស​ព្រៃឈើ ព្រោះ​ពួកគេ​ឃុបឃិត​គ្នា​ដើម្បី​ផលប្រយោជន៍​យ៉ាង​ងងើល​អស់​រយៈពេល​ជាច្រើន​ឆ្នាំ​កន្លងមកហើយ​៕

jiva-t1-282x500 jiva-t-500x358

Source link

ពលរដ្ឋ​ជាច្រើន​គ្រួសារ​នៅ​ឃុំ​បេង ស្រុក​បន្ទាយ​អំពិល កំពុង​រងគ្រោះ​ដោយសារ​យោធា​បំពាន​លើដី​ធ្លី​

​ប្រជាពលរដ្ឋ​រងគ្រោះ​ដោយសារ​យោធា​តំបន់​ប្រតិបត្តិការ​សឹក​រង​ស្រុក​បន្ទាយ​អំពិល ឆក់​ប្លន់​ដីធ្លី បាន​អំពាវនាវ​ឲ្យ​លោក ស ថា​វី ជា​អភិបាលខេត្ត​ឧត្ដរមានជ័យ និង​ថ្នាក់ដឹកនាំ​ក្រសួងការពារជាតិ ចាត់វិធានការ​ជួយ​ដោះស្រាយ​ដល់​ពួកគាត់​ជាបន្ទាន់​។ ដោយហេតុថា ពួកគាត់​១៤​គ្រួសារ​ដែល​រស់​នៅតាម​ខ្សែបន្ទាត់​ព្រំដែន​-​សៀម ក្នុងភូមិ​ជប់​គគីរ​ខាងកើត ឃុំ​បេង ស្រុក​បន្ទាយ​អំពិល ត្រូវ​យោធា​ស្រុក​បន្ទាយ​អំពិល ប្រើ​អំណាច​បណ្ដេញចេញ​និង​រុះរើ​លំនៅដ្ឋាន​របស់​ពួកគាត់​យ៉ាង​កំរោល​។ ប្រជាពលរដ្ឋ​រងគ្រោះ​បាន​បញ្ជាក់ថា ការដែល​កម្លាំងយោធា​ស្រុក​បន្ទាយ​អំពិល បណ្ដេញ​ពួកគាត់​ចេញពី​ដីធ្លី​គឺមាន​ការឃុបឃិត​ជាមួយ​មន្ត្រី​អាជ្ញាធរ​ស្រុក​បន្ទាយ​អំពិល​ផងដែរ ដែលជា​ហេតុ​ធ្វើ​ឲ្យ​ពួកគាត់​ប្រឈម​នឹង​ទុក្ខលំបាក​គ្មាន​ទីបំផុត​។

​ប្រភពពី​ប្រជាពលរដ្ឋ​រងគ្រោះ​បាន​បញ្ជាក់ថា កាលពី​ថ្ងៃទី​២៥ ខែកក្កដា ឆ្នាំ​២០១៧ មាន​កម្លាំងយោធា​តំបន់​ប្រតិបត្តិការ​សឹក​រង​ស្រុក​បន្ទាយ​អំពិល ប្រមាណ​២០​នាក់​ក្រោម​បញ្ជា​របស់​មេបញ្ជាការ​តំបន់​ប្រតិបត្តិការ​សឹក​រង​ខេត្តឧត្ដរមានជ័យ បាន​ចុះមក​ធ្វើ​សកម្មភាព​រុះរើ​លំនៅដ្ឋាន​របស់​ពួកគាត់​១៤​គ្រួសារ​។ ប្រជាពលរដ្ឋ​បាន​លើកឡើងថា ពួកគាត់​រស់នៅក្នុង​តំបន់​នេះ​និង​អាស្រ័យ​ផលដំណាំ​ច្រើន​ឆ្នាំ​មកហើយ ស្រាប់តែ​ខាង​យោធា​បែរជា​ចោទប្រកាន់​ពួកគាត់​ថា​មក​រស់នៅក្នុង​តំបន់ស និង​ពីមុខ​ខ្សែត្រៀម​។ ប្រការនេះ​កំពុង​ធ្វើ​ឲ្យ​ពលរដ្ឋ​រងគ្រោះ​ប្រឈម​នឹង​លំបាក​សព្វបែបយ៉ាង ព្រោះ​ពួកគាត់​មក​រស់នៅ​និង​ធ្វើស្រែ​ចម្ការ​ក្នុង​តំបន់​នេះ​ច្រើន​ឆ្នាំ​មកហើយ រហូត​ក្លាយជា​តំបន់​ដែល​ខាង​ភាគី​សៀម​មិន​ហ៊ាន​ឈ្លានពាន​ទឹកដី​ខ្មែរ​តទៅទៀត​ផងដែរ​។

បើតាម​ការ​បង្ហើប​ពី​មន្ត្រី​អាជ្ញាធរ​ឃុំ​បេង ស្រុក​បន្ទាយ​អំពិល បាន​ឲ្យ​ដឹងថា​មាន​អ្នកមាន​លុយ​ចង់បាន​ដី​ក្នុង​តំបន់​នោះ ទើប​គេ​ឃុបឃិត​ជាមួយ​ខាង​យោធា​ឲ្យ​បណ្ដេញ​ប្រជាពលរដ្ឋ​ចេញពី​លំនៅដ្ឋាន​យ៉ាង​កំរោល​ទៅវិញ​។ ប្រការនេះ​លោក ស ថា​វី អភិបាលខេត្ត​ឧត្ដរមានជ័យ និង​ថ្នាក់ដឹកនាំ​ក្រសួងការពារជាតិ មិនគួរ​មើលរំលង​តទៅទៀត​ទេ​ហើយ​បើ​មាន​គម្រោង​បណ្ដេញ​ប្រជាពលរដ្ឋ​ចេញពី​លំនៅដ្ឋាន គួរ​មាន​សំណង​សមរម្យ​ដែល​ប្រជាពលរដ្ឋ​អាច​ទទួលយកបាន​។ ដោយហេតុថា​ប្រជាពលរដ្ឋ​មាន​ហេតុផល​អ្វី​ត្រូវ​ប្រឆាំងនឹង​គម្រោង​ផ្សេងៗ​របស់​រដ្ឋាភិបាល ឬ​មន្ត្រី​អាជ្ញាធរ​នោះទេ ប៉ុន្តែ​ការឆក់ប្លន់​ដីធ្លី​ឬ​បណ្ដេញ​ចេញពី​លំនៅដ្ឋាន​គួរ​មាន​ដំណោះស្រាយ​ដល់​ពួកគាត់ ដើម្បី​ពួកគាត់​អាច​សាង​ជីវភាព​ថ្មី​នៅ​ទីកន្លែង​ផ្សេងទៀត​៕

ថថ-2 ថថ-1-1

Source link

មន្ត្រី​យោធា​ផ្កាយ​១​ឈ្មោះ គង់ ក្រឹ​ង បន្ត​ដឹកជញ្ជូន​ឈើ​ចេញទៅ​ស្រុក​យួន​ដោយ​គ្មាន​សមត្ថកិច្ច​ណា​រំខាន​

​ប្រភពពី​មន្ត្រី​យោធា​តូចតាច​នៅក្នុង​អង្គភាព​វរ​ការពារ​ព្រំដែន​លេខ​២០៤ ក្នុងស្រុក​ស្នួល ខេត្តក្រចេះ បាន​ឲ្យ​ដឹងថា​ឈ្មួញ​ជា​មន្ត្រី​យោធា​ពាក់​ផ្កាយ​១​ឈ្មោះ គង់ ក្រឹ​ង ដែលមាន​ងារ​ជា​ឧកញ៉ា​ផង​នោះ​នៅតែ​បន្តសកម្មភាព​ដឹកជញ្ជូន​ឈើ​ចេញទៅ​ស្រុក​យួន​តាម​ច្រករបៀង​ដេ​២ និង​ដេ​៣​តាម​អំពើ​ចិត្ត​។ ការដែល​ឈ្មួញ គង់ ក្រឹ​ង ហ៊ាន​ធ្វើ​អ្វីៗ​តាម​អំពើ​ចិត្ត​គឺ​ដោយសារ​មានការ​ឃុបឃិត​ជាមួយ​មន្ត្រីរដ្ឋបាល​ព្រៃឈើ​គ្រប់លំដាប់​ថ្នាក់​ក្នុង​ខេត្តក្រចេះ ជាពិសេស​សមត្ថកិច្ច​ពា​ក់​ព័ន្ធ​នៅក្នុង​ស្រុក​ស្នួល​។ ប្រការនេះ​បង្ហាញ​យ៉ាងច្បាស់​ថា​បទបញ្ជា​របស់​លោកនាយក​រដ្ឋមន្ត្រី ហ៊ុន សែន ក្នុងការ​ទប់ស្កាត់​បទ​ល្មើស​រត់ពន្ធ​ឈើ​ទៅ​ស្រុក​យួន​ក្លាយជា​រឿង​ឥតន័យ ព្រោះ​ឈ្មួញ គង់ ក្រឹ​ង និង​បក្ខពួក​នៅតែ​អាច​ដឹកជញ្ជូន​ឈើ​ទៅ​ស្រុក​យួន​យ៉ាង​រលូន​។

​តាម​ប្រភពព័ត៌មាន​ពី​មន្ត្រី​អាជ្ញាធរ និង​ប្រជាពលរដ្ឋ​ក្នុងភូមិ​ត្រពាំង​ស្រែ ឃុំ​២​ធ្នូ ស្រុក​ស្នួល បាន​ឲ្យ​ដឹងថា​ឈ្មួញ គង់ ក្រឹ​ង បាន​ប្រើ​សិទ្ធិអំណាច​ជា​មេបញ្ជាការរង​វរ​ការពារ​ព្រំដែន​លេខ​២០៤ ដើម្បី​យក​ទីតាំង​បញ្ជា​អង្គភាព​នេះ​ធ្វើជា​កន្លែង​ប្រមូល​ទិញ​ឈើ​និង​ស្តុក​ឈើ​ទុក​សម្រាប់​ដឹកជញ្ជូន​ទៅ​ស្រុក​យួន​។ ប្រភពពី​មន្ត្រី​អាជ្ញាធរ​មូលដ្ឋាន​បាន​ឲ្យ​ដឹងថា​ឈ្មួញ គង់ ក្រឹ​ង បាន​យក​ទីតាំង​វរ​សេនា​តូច​លេខ​១ ធ្វើជា​កន្លែង​ស្តុក​ឈើ​ប្រណីត​ខុសច្បាប់ និង​មួយកន្លែង​ទៀត​នៅក្នុង​កសិដ្ឋាន​ចិញ្ចឹម​គោ​របស់ខ្លួន​ក៏​ឈ្មួញ គង់ ក្រឹ​ង ប្រមូល​ទិញ​ឈើ​និង​ស្តុក​ឈើ​ខុសច្បាប់​ដែរ​។ ជា​រៀងរាល់ថ្ងៃ​មាន​ឈ្មួញ​ដឹកឈើ​តាម​រថយន្ត​សាំ​យ៉ុង​ជាច្រើន​គ្រឿង និង​ដឹក​តាម​ម៉ូតូ​រាប់រយ​គ្រឿង​យកមក​លក់​ឲ្យ​ឈ្មួញ គង់ ក្រឹ​ង ដែលជា​មន្ត្រី​យោធា​ពាក់​ផ្កាយ​១​នៅ​ទីតាំង​ខាងក្រោយ​វរ​សេនា​តូច​លេខ​១​យ៉ាង​គគ្រឹកគគ្រេង​ដោយ​ពុំមាន​មន្ត្រី​ជំនាញ​ឬ​សមត្ថកិច្ច​ណា​ចាត់វិធានការ​បង្ក្រាប​ឡើយ​។

​សេចក្ដីរាយការណ៍​ពី​សមត្ថកិច្ច​ក្នុងស្រុក​ស្នួល ខេត្តក្រចេះ មួយចំនួន​បាន​ឲ្យ​ដឹងថា នៅពេល​ប្រមូល​ទិញ​បាន​ឈើ​ប្រណីត​គ្រប់​ចំនួន​តាម​ការបញ្ជាទិញ​របស់​ឈ្មួញ​យួន​ទើប​ឈ្មួញ គង់ ក្រឹ​ង លើកដាក់​រថយន្ត​កុងតឺន័រ​ធំៗ​រួច​យក​បាវ​ស្ករស​ដាក់​ពីលើ​ហើយ​ដឹកចេញទៅ​ស្រុក​យួន​យ៉ាង​រលូន​។ ប្រភព​បាន​ឲ្យ​ដឹង​ទៀតថា ក្នុង​មួយថ្ងៃៗ​យ៉ាងហោចណាស់​ក៏​ឈ្មួញ គង់ ក្រឹ​ង ដឹកជញ្ជូន​ឈើ​ចេញទៅ​ស្រុក​យួន​១​រថយន្ត​កុងតឺន័រ​ដែរ ជាងនេះទៅទៀត​មាន​ករណី​ដឹកជញ្ជូន​ឈើ​តាម​រទេះគោ​ក្របី​ចេញទៅ​ស្រុក​យួន​តាម​ច្រករបៀង​ដេ​២ និង​ដេ​៣​ដែលជា​ច្រក​ផ្ដាច់មុខ​របស់​ឈ្មួញ គង់ ក្រឹ​ង​។ មន្ត្រី​អាជ្ញាធរ​មូលដ្ឋាន​ក្នុងស្រុក​ស្នួល ខេត្តក្រចេះ បាន​រិះគន់ថា​លោក សរ ចំ​រ៉ុង អភិបាលខេត្ត​ក្រចេះ និង​នាយ​ខណ្ឌ​រដ្ឋបាល​ព្រៃឈើ​ខេត្តក្រចេះ ទំនងជា​ទទួលបាន​ផលប្រយោជន៍​មួយផ្នែក​ណា​នោះ​ពី​ឈ្មួញ គង់ ក្រឹ​ង ទើប​បណ្ដោយ​ឲ្យ​ឈ្មួញ​ម្នាក់នេះ​បន្តសកម្មភាព​ដឹកជញ្ជូន​ឈើ​ចេញទៅ​ស្រុក​យួន​ដោយ​គ្មាន​ញញើត​អ្វី​ទាំងអស់​៕

16344273_263651940722440_1533922886_n 20401301_1432357746857811_2011381036_n - Copy 20401301_1432357746857811_2011381036_n 20182864_254709771695834_1997209156_n

Source link

IMF៖ ​កម្ពុជា​គួរ​ឃ្មាតខ្មី​កែទម្រង់​បន្ថែម​ដើម្បី​ទ្រទ្រង់​កំណើន​សេដ្ឋកិច្ច


ក្នុង​ការ​វាយ​តម្លៃ​ប្រចាំឆ្នាំ​មួយ​ដែល​ចេញ​ផ្សាយ​នៅ​ល្ងាច​ថ្ងៃ​អង្គារ​ ​មូល​និធិ​រូបិយ​វត្ថុ​អន្តរជាតិ​ IMF ​បាន​ព្យាករណ៍​ថា ​សេដ្ឋកិច្ច​កម្ពុជា​នឹង​បន្ត​អត្រា​កំណើន​៧%​ថេរ​សម្រាប់​ឆ្នាំ២០១៧ ​និង​ឆ្នាំ២០១៨​ ស្រប​ពេល​ដែល​សេដ្ឋកិច្ច​ប្រទេស​នេះ​ចាប់​ផ្ដើម​រង​ឥទ្ធិពល​ពី​ភាព​មិន​ប្រាកដ​ប្រជា​នៃ​ការ​បោះឆ្នោត​ជាតិ​នៅ​ឆ្នាំ​ក្រោយ។​

ជាមួយ​នឹង​កំណើន​សេដ្ឋកិច្ច​ ​ដែល​អាច​នៅ​តែ​រក្សា​បាន​អត្រា​ប្រមាណ​៧%​សម្រាប់​ឆ្នាំ​២០១៧ ​និង​ឆ្នាំ​២០១៨ ​កម្ពុជា​ត្រូវ​តែ​ខិត​ខំ​បន្ថែម​ទៀត​ក្នុង​ការ​ធ្វើ​កំណែ​ទម្រង់​ក្នុង​វិស័យ​គន្លឹះ​មួយ​ចំនួន​ ដើម្បី​រក្សា​បាន​នូវ​កំណើន​ប្រកប​ដោយ​ចីរភាព ​និង​ស្ថិរភាព​នៃ​វិស័យ​សេដ្ឋកិច្ច ​ខណៈ​ដែល​សេដ្ឋកិច្ច​កម្ពុជា​កំពុង​ទទួល​រង​ឥទ្ធិពល​ពី​ភាព​មិន​ប្រាកដ​ប្រជា​នៃ​ការ​បោះឆ្នោត​ជាតិ​នៅ​ឆ្នាំ​ក្រោយ។ នេះ​ជា​អនុសាសន៍​របស់​មូលនិធិ​រូបិយវត្ថុ​អន្តរជាតិ ​(IMF)។​

កាល​ពី​ល្ងាច​ថ្ងៃ​អង្គារ ក្នុង​សេចក្ដី​សន្និដ្ឋាន​ដើម្បី​បិទ​បញ្ចប់​ «ការ​ពិគ្រោះ​យោបល់​មាត្រា៤» ​ដែល​ជា​ការ​សិក្សា​វាយ​តម្លៃ​ និង​ឱ្យ​យោបល់​ប្រចាំ​ឆ្នាំ​របស់​ ​IMF ​ទៅ​លើ​ប្រទេស​ជា​សមាជិក​ ​លោក ​Jarkko ​Turunen ​អនុ​ប្រធាន​ផ្នែក​តំបន់​អាស៊ី​ប៉ាស៊ីហ្វីក​របស់​ IMF​ បាន​ឱ្យ​ដឹង​ថា ​សេដ្ឋកិច្ច​កម្ពុជា​នឹង​បន្ត​រក្សា​ភាព​ខ្លាំង​មាំទាំ​របស់​ខ្លួន​បន្ត​ទៅ​ទៀត ​បើ​ទោះ​ជា​មាន​ការ​ធ្លាក់​ចុះ​នៃ​ការ​វិនិយោគ​ឯកជន​យ៉ាង​ណា​ក្ដី។​

អ្នក​ជំនាញ​ការ ​IMF ​រូប​នេះ​បាន​និយាយ​ដូច្នេះ​ថា៖​

«កម្ពុជា​បន្ត​មាន​កំណើន​[សេដ្ឋកិច្ច]​ក្នុង​សន្ទុះ​ក៏​គួរ​ឱ្យ​រំភើប​ចិត្ត»។ ​សកម្ម​ភាព​សេដ្ឋកិច្ច​បន្ត​មាន​សភាព​ខ្លាំង​ក្នុង​ឆ្នាំ​២០១៦​ ​ខណៈ​ដែល​អតិ​ផរណា​បាន​កើន​ដល់​៣%​កាល​ពី​ឆ្នាំ​ទៅ ​ដែល​បណ្ដាល​មក​ពី​ការ​ហក់​ឡើង​នៃ​តម្លៃ​ស្បៀង​ និង​ថាមពល ​… ។ សេចក្ដី​ប្រមើ​មើល​នៃ​សេដ្ឋកិច្ច​កម្ពុជា​បន្ត​មាន​លក្ខណៈ​វិជ្ជមាន ​បើ​ទោះ​ជា​មាន​ហានិភ័យ​នៃ​និន្នាការ​ធ្លាក់​ចុះ​[នៃ​សូចនាករ​មួយ​ចំនួន]​ក៏​ដោយ»។​

លោក ​Jarkko ​Turunen ​បាន​បន្ត​ថា៖​

«[សេដ្ឋ​កិច្ច]​កម្ពុជា​បាន​បន្ត​កើន​ឡើង​យ៉ាង​លឿន​រហ័ស​ ក្នុង​រយៈពេល​ពីរ​ទៅ​បី​ទសវត្សរ៍​ចុង​ក្រោយ ​ដែល​ទ្រទ្រង់​ដោយ​បរិការណ៍​ម៉ាក្រូ​សេដ្ឋកិច្ច​មួយ​ដែល​ប្រកប​ដោយ​ស្ថិរ​ភាព ​ប្រព័ន្ធ​សេដ្ឋកិច្ច​ដែល​បើក​ចំហ​ និង​មាន​ចរឹត​ផ្ដោត​លើ​ទីផ្សារ​ ទី​តាំង​ភូមិ​សាស្ត្រ​ក្នុង​តំបន់​ដែល​មាន​ការ​លូត​លាស់​លឿន​បំផុត​ក្នុង​ពិភព​លោក​ និង​ក្រុម​ប្រជាជន​ដែល​មាន​វ័យ​ក្មេង​របស់​ប្រទេស​នេះ»។​

ដើម្បី​បន្ត​កំណើន​នេះ​ត​ទៅ​មុខ​ទៀត​ ​មូល​និធិ​រូបិយវត្ថុ​អន្តរជាតិ ​(IMF) ​បាន​លើក​ឡើង​ជា​អនុសាសន៍​នានា​ឱ្យ​ប្រទេស​ដែល​ស្ថិត​ក្នុង​តំបន់​អាស៊ី​អាគ្នេយ៍​មួយ​នេះ ​បន្ត​ខិត​ខំ​ឃ្មាត​ខ្មី ​លៃលក​កែ​ទម្រង់​លើ​វិស័យ​សេដ្ឋកិច្ច ​និង​ហិរញ្ញ​វត្ថុ​ដើម្បី​ទ្រទ្រង់ ​និង​បន្ត​ស្ថិរភាព​នៃ​កំណើន។​

IMF ​បាន​កត់​សម្គាល់​អំពី​ផ្លែផ្កា​នៃ​ការ​អនុវត្ត​យុទ្ធ​សាស្ត្រ​ប្រមូល​ចំណូល ​(RMS) ​តាម​រយៈ​កំណែ​ទម្រង់​វិស័យ​ពន្ធ​ដារ ​ខណៈ​ដែល​រដ្ឋា​ភិបាល​បាន​ប្រកាស​នៅ​សប្ដាហ៍​នេះ​ថា ​ក្នុង​ការ​ប្រមូល​ចំណូល​ពន្ធ​៦​ខែ​ដើម​ឆ្នាំ​២០១៧​នេះ ​រដ្ឋ​កៀង​គរថវិកា​បាន​ប្រមាណ​១១៩២,៤០​លាន​ដុល្លារ​អាមេរិក​ គិត​ជា​កំណើន ​គឺ​កើន​បាន​៣២,១៤% បើ​ធៀប​នឹង​រយៈពេល​ដូច​គ្នា​នៅ​ឆ្នាំ​២០១៦។​

យ៉ាង​ណាក្ដី​ លោក ​Jarkko​ Turunen ​បាន​លើក​ឡើង​ថា៖​

«សម្លឹង​ឆ្ពោះ​ទៅ​មុខ ​កម្ពុជា​នឹង​ត្រូវ​ពើប​ប្រទះ​ទទួល​រង​សម្ពាធ​នៃ​កំណើន​ចំណាយ​[សាធារណៈ]​ ​ហើយ​ប្រសិន​ជា​យុទ្ធសាស្ត្រ​ប្រមូល​ចំណូល ​(RMS) ​មិន​ត្រូវ​បាន​ផ្ដល់​ថាម​ភាព​ឡើង​វិញ​ទេ​ នោះ​កំណើន​នៃ​ចំណូល​[ពន្ធ​រដ្ឋ] ​អាច​នឹង​ត្រូវ​រំពឹង​ថា ស្ថិត​ក្នុង​អត្រា​ធម្មតាៗ​វិញ​ម្ដង»។​

ក្នុង​នោះ​កម្ពុជា​ត្រូវ​បាន​ស្នើ​ឱ្យ​ធ្វើ​កំណែ​ទម្រង់​រូបវ័ន្ត​នានា ​ដើម្បី​បង្កើន​នូវ​ភាព​ប្រកួត​ប្រជែង​ក្នុង​ពាណិជ្ជ​កម្ម ​និង​កម្មន្តសាល ​កែ​សម្រួល​លើក​ទឹក​ចិត្ត​ដល់​ការ​ធ្វើ​ពិពិធ​កម្ម​សេដ្ឋកិច្ច​តាម​រយៈ​ការ​គ្រប់​គ្រង​តម្លៃ​ថាមពល​ឱ្យ​នៅ​ទាប​ កែ​លម្អ​ និង​ធ្វើ​ឱ្យ​ប្រសើរ​ឡើង​មូលធន​មនុស្ស ​និង​ហេដ្ឋា​រចនា​សម្ព័ន្ធ​ ​ក៏​ដូច​ជា​ខិត​ខំ​បន្ថែម​ទៀត ​ក្នុង​ការ​ពង្រឹង​«នីតិ​រដ្ឋ» ​និង​«តម្លា​ភាព» ​លើ​រាល់​វិស័យ​ទាំង​អស់។​

ការ​លើក​កម្ពស់​នានា​ក្នុង​ការ​អភិវឌ្ឍ​ទីផ្សារ​ហិរញ្ញវត្ថុ​ ដែល​រួម​បញ្ចូល​ទាំង​ការ​លើក​ទឹក​ចិត្ត​ឱ្យ​មាន​ការ​ប្រើ​ប្រាស់​រូបិយ​បណ្ណ​ជាតិ​កាន់​តែ​ច្រើន​ឡើង​ ​ក៏​ដូច​ជា​ការ​កែ​លម្អ​ហេដ្ឋារចនា​សម្ព័ន្ធ​ហិរញ្ញវត្ថុ ​និង​ការ​បង្កើន​កម្រិត​អក្ខរកម្ម​ហិរញ្ញវត្ថុ ​ក៏​ត្រូវ​បាន​ចាត់ទុក​ជា​អនុសាសន៍​ដល់​អ្នក​តាក់​តែង​គោល​នយោបាយ​កម្ពុជា​ផង​ដែរ។

លោក ​Miguel​ Chanco ​អ្នក​វិភាគ​នាំ​មុខ​លើ​កិច្ច​ការ​អាស៊ាន​នៃ​អង្គភាព​ស៊ើប​អង្កេត​នៃ​ទស្សនា​វដ្ដី ​Economist ​(EIU)​បាន​និយាយ​សង្កត់​ធ្ងន់​ថា ​បញ្ហា​មូល​ធន​មនុស្ស ​ការ​ពង្រឹង​នីតិ​រដ្ឋ ​និង​ការ​ជំរុញ​តម្លា​ភាព​នៅ​កម្ពុជា ​ពុំ​មាន​អ្វី​ប្រសើរ​ឡើង​ជា​ដុំ​កំភួន​សោះ​ឡើយ ​ហើយ​ការ​ពង្រឹង​បង្កើន​ភាព​ប្រកួត​ប្រជែង​ទៀត​សោត ​ក៏​ធ្លាក់​ខ្សោយ​ថែម​ទៀត​ក្នុង​រយៈពេល​ប៉ុន្មាន​ឆ្នាំ​ចុង​ក្រោយ​នេះ ​ដោយ​សារ​តែ​ការ​កើន​ឡើង​នៃ​ប្រាក់​ឈ្នួល​អប្បបរមា​ក្នុង​វិស័យ​វាយន​ភណ្ឌ។

លោក ​Miguel​ Chanco ​បាន​ប្រាប់ ​VOA​ តាម​រយៈ​សារ​អេឡិច​ត្រូនិច​ ក្នុង​ន័យ​ដើម​ថា៖​

«ភាព​រឹង​មាំ​ជាង​មុន​នៃ​ប្រាក់​ដុល្លារ​អាមេរិក​ដែល​អូស​បន្លាយ​តាំង​ពី​ឆ្នាំ​២០១៥​មក ​បាន​បង្ក​នូវ​ចំហាយ​ប៉ះពាល់​ផង​ដែរ ​ដល់​សេដ្ឋ​កិច្ច​ដែល​មាន​អត្រា​ដុល្លា​រូបនីយកម្ម​ខ្លាំង​ ខ្ពស់​[ដូច​ជា​កម្ពុជា]»។​

ស្រប​ពេល​ដែល ​IMF ​បាន​លើក​ឡើង​អំពី​សារៈ​សំខាន់​នៃ​ការ​ពង្រឹង​ភាព​ធុន​នឹង​ហានិភ័យ​នានា​ដែល​បង្ក​ដោយ​ការ​ប្រែប្រួល​អាកាស​ធាតុ​ទៅ​លើ​វិស័យ​កសិកម្ម​ ​លោក​ Chanco ​បាន​លើក​ឡើង​ថា​ ​វិស័យ​កសិកម្ម​ដែល​មាន​កំណើន​រយីក​រយាក​ក្នុង​ពេល​ប៉ុន្មាន​ឆ្នាំ​ចុង​ក្រោយ​នេះ​ ​ក៏​នៅ​តែ​បន្ត​ជួប​បញ្ហា​នៅ​ក្នុង​រយៈពេល​ទៅ​ខាង​មុខ ​ជាមួយ​នឹង​ប្រព័ន្ធ​តម្លៃ​ទីផ្សារ​មិន​មាន​ស្ថិរភាព ​និង​អាកាស​ធាតុ​មាន​លក្ខណៈ​កាន់​តែ​មិន​ទៀង​ទាត់។ ​លោក​បន្ត​ថា៖​

«ការណ៍​នេះ​នឹង​បន្ត​ទម្លាក់​បន្ទុក​ជះ​ផល​ប៉ះ​ពាល់​ដល់​អត្រា​នៃ​ការ​ចំណាយ ​និង​ការ​ប្រើ​ប្រាស់​សេវា​នៅ​ជនបទ។ ​ជា​លទ្ធ​ផល​ ​បញ្ហា​នៃ​ការ​ជាប់​ជំពាក់​បំណុល​វ័ន្ត​ក​នៅ​ជនបទ​នឹង​នៅ​តែ​បន្ត​អូស​បន្លាយ​ថែម​ទៀត»។​

ភាព​ជាប់​ទាក់​ទង​គ្នា​រវាង​ដំណើរ​វិវឌ្ឍ​ចុង​ក្រោយ​នៃ​ស្ថានភាព​នយោបាយ​ក្នុង​ស្រុក ​និង​បញ្ហា​កំណើន​សេដ្ឋកិច្ច ​ក៏​ត្រូវ​បាន​លើក​ឡើង​ជា​ការ​គូស​បញ្ជាក់​របស់​ IMF ​ផង​ដែរ។​

កម្ពុជា​នឹង​រៀប​ចំ​ការ​បោះ​ឆ្នោត​ជ្រើស​រើស​តំណាង​រាស្ត្រ​នៅ​ឆ្នាំ​ក្រោយ ​ដែល​កៅអី ​និង​ប្រជាប្រិយ​ភាព​របស់​គណបក្ស​ប្រជាជន​កម្ពុជា​ដែល​ស្ថិត​ក្នុង​អំណាច​ជិត​បួន​ទសវត្សរ៍​មក​ហើយ​នេះ​ ​នឹង​ត្រូវ​ប្រឈម​នឹង​គណបក្ស​ប្រឆាំង​ដែល​មាន​ប្រជាប្រិយ​ភាព​ប្រហាក់​ប្រហែល​គ្នា។ ​លោក​នាយក​រដ្ឋមន្ត្រី​ ហ៊ុន សែន ​ដែល​ជា​ប្រមុខ​គណបក្ស​កាន់​អំណាច បាន​ព្រមាន​ជា​ច្រើន​លើក​ រាប់​មិន​អស់ ​អំពី​លទ្ធ​ភាព​នៃ​សង្គ្រាម​ស៊ីវិល​ ដែល​អាច​ផ្ទុះ​ឡើង​ ​ល្គិក​ណា​គណបក្ស​របស់​លោក​ចាញ់​ឆ្នោត​នៅ​ឆ្នាំ​ក្រោយ។​

ស្រប​ពេល​ជាមួយ​គ្នា​នេះ ​«ភាព​មិន​ប្រាកដ​ប្រជា​ទាក់ទង​នឹង​ការ​បោះ​ឆ្នោត»​ បាន​នាំ​ឱ្យ​មាន​ការ​ធ្លាក់​ថម​ថយ​នៃ​ការ​វិនិយោគ​ឯកជន​នៅ​ក្នុង​ឆ្នាំ​នេះ។ ​នេះ​បើ​យោង​តាម​លោក ​Jarkko ​Turunen ​នៃ​ IMF៖។​

លោក​និយាយ​ថា៖​

«យើង​សង្កេត​ឃើញ​ការ​ធ្លាក់​ថម​ថយ​មួយ​ចំណែក​ក្នុង​ការ​វិនិយោគ​ឯកជន ​ដែល​បណ្ដាល​មក​ពី​«ភាព​មិន​ប្រាកដ​ប្រជា​ទាក់​ទង​នឹង​ការ​បោះ​ឆ្នោត។ ​យ៉ាង​ណា​ក្ដី ​យើង​ក៏​សង្កេត​ឃើញ​ផង​ដែរ​ថា ​ការណ៍​នេះ​ត្រូវ​បាន​ទូទាត់​កែ​កុន​ដោយ​កំណើន​នៃ​ចំណាយ​សាធារណៈ»។

អ្នក​វិភាគ​ Miguel​ Chanco ​បាន​លើក​ឡើង​ថា​ ​អស្ថិរ​ភាព​នយោបាយ​ដែល​កើន​ឡើង​តាំង​ពី​ឆ្នាំ​២០១៥​មក ​បាន​បន្ត​រុញ​ច្រាន​វិនិយោគិន​មួយ​ចំនួន​ ដែល​ស្វះស្វែង​រក​ឱកាស​ចង់​ដាក់​ទុន​នៅ​កម្ពុជា​ មិនទាន់​ហ៊ាន​បោះទុន​ ដោយ​នៅ​ស្ងៀម​ចាំ​មើល​ស្ថានភាព​នៃ​ការ​បោះឆ្នោត​ឆ្នាំ​២០១៨​ ហើយ​លោក​រំពឹង​ទុក​ថា ​ការ​ដាក់​ទុន​វិនិយោគ​លើ​វិស័យ​ឯកជន​នៅ​កម្ពុជា ​នឹង​បន្ត​ចុះ​ខ្សោយ​បន្ថែម​ទៀត​ក្នុង​រដូវកាល​បោះ​ឆ្នោត​ជាតិ​នៅ​កម្ពុជា​លើក​នេះ។

«និយាយ​មែន​ទែន​ទៅ ​យើង​អាច​រំពឹង​ទុក​ថា ​វិនិយោគិន​មួយ​ចំនួន​ដែល​ចង់​ដាក់​ទុន​នៅ​កម្ពុជា ​ទំនង​ជា​ជ្រើស​យក​វិធី​សាស្ត្រ​ឈរ​ស្ងៀម ​និង​រង់​ចាំ​មើល​[ស្ថាន​ការណ៍​វិវត្តន៍​ក្នុង​ការ​បោះឆ្នោត]​ ហើយ​គ្រឹះ​ស្ថាន​ជំនួញ​នានា​រំពឹង​ចង់​បាន​ការ​បោះឆ្នោត​មួយ​ដ៏​ស្អាត​ស្អំ ​និង​មាន​ការ​ផ្ទេរ​អំណាច​ដោយ​សន្តិវិធី ​បើ​សិន​ជា​ចាំ​បាច់»។

ការ​ព្យាករណ៍​របស់​ IMF ​នេះ​ត្រូវ​នឹង​ការ​ទាយ​ទុក​របស់​រាជ​រដ្ឋាភិបាល​កម្ពុជា ​ដែល​រំពឹង​ថា​ ​កំណើន​សេដ្ឋកិច្ច​កម្ពុជា​នឹង​បន្ត​ស្ថិត​ក្នុង​អត្រា​៧%​សម្រាប់​ឆ្នាំនេះ ​និង​ពីរ​ឆ្នាំ​ទៅ​ខាង​មុខ ​ហើយ​កាល​ពី​ខែ​ឧសភា ​ឆ្នាំ​២០១៧​នេះ ​រដ្ឋា​ភិបាល​កម្ពុជា​ក៏​បាន​ប្រកាស​ដែរ​ថា​ ខ្លួន​នឹង​ប្ដេជ្ញា​រក្សា​«ប្រក្រតី​ភាព»​ក្នុង​វិស័យ​សេដ្ឋកិច្ច​សម្រាប់​ឆ្នាំ​បោះ​ឆ្នោត​២០១៨​ខាង​មុខនេះ៕

Source link

លោក សម រង្ស៊ី បញ្ជាក់ថា បក្ស​កាន់អំណាច​កំពុងតែ​បារម្ភ​ខ្លាំង​ថា ធនធានមនុស្ស​ក្នុង​គណបក្ស​ខ្លួន​ចុះចូល​ ជាមួយ​គណបក្ស​សង្គ្រោះ​ជាតិ កាន់តែ​ច្រើនឡើងៗ​

នៅ​ដើម​សប្តាហ៍​នេះ​អតីត​ប្រធាន​គណបក្ស​សង្គ្រោះ​ជាតិ លោក សម រង្ស៊ី បាន​ថ្លែង​ទៅកាន់​ប្រជាពលរដ្ឋ​ខ្មែរ​នៅ​ប្រទេស​បារាំង​ថា គណបក្ស​ប្រជាជន​កម្ពុជា​ជា​គណបក្សកាន់អំណាច​មិន​ត្រឹមតែ​ភ័យខ្លាច​បាត់បង់​អំណាច​នៅក្នុង​ការបោះឆ្នោត​ឆ្នាំ​២០១៨​នោះទេ តែ​ពួកគេ​ក៏​កំពុង​បារម្ភ​ខ្លាំង​ថា​ធនធានមនុស្ស​នៅក្នុង​គណបក្ស​របស់ខ្លួន​ពិសេស​មន្ត្រី​ស្អាតស្អំ និង​មាន​សមត្ថភាព​ពិតប្រាកដ​នឹង​ចុះចូល​ជាមួយ​គណបក្ស​សង្គ្រោះ​ជាតិ​ដែលជា​គណបក្សជំទាស់ ដើម្បី​រួបរួមគ្នា​អភិវឌ្ឍន៍​ប្រទេស​កម្ពុជា​ឲ្យ​មាន​ភាពប្រសើរឡើង​លើផ្លូវ​វិជ្ជមាន​។​

លោក សម រង្ស៊ី បាន​ពន្យល់ថា បច្ចុប្បន្ន​មាន​មន្ត្រី​ស្អាតស្អំ និង​មាន​សមត្ថភាព​ច្រើនណាស់​នៅ​ប្រទេស​កម្ពុជា ហើយ​ពួកគេ​ក៏មាន​មនសិការ​ស្នេហា​ជាតិ​ខ្ពស់​ផងដែរ តែ​ពួកគេ​មិនអាច​បញ្ចេញ​សមត្ថភាព​ពិតប្រាកដ​ដើម្បី​ចូលរួមចំណែក​កសាង​ប្រទេសជាតិ​នោះទេ​។ បញ្ហា​ទាំងនេះ​ក៏​ដោយសារតែ​រដ្ឋាភិបាល​សព្វថ្ងៃ​ក្រោម​ការដឹកនាំ​របស់​ក្រុម​អ្នកដឹកនាំ​ដែល​គ្មាន​សមត្ថភាព ពុករលួយ និង​បក្ខពួកនិយម​ដែលជា​ឱកាសល្អ​សម្រាប់​មន្ត្រី​ពុករលួយ ឈ្មួញ​ពុករលួយ និង​ពូកែ​អែបអប​ដោយ​ប្រើប្រាស់​អំណាច និង​ទឹក​លុយ​របស់​ពួកគេ​កេងប្រវ័ញ្ច​ថវិកាជាតិ និង​រកស៊ី​មិន​ស្របច្បាប់​ដែល​ធ្វើ​ឲ្យ​ពលរដ្ឋ​រងគ្រោះ និង​ប្រទេសជាតិ​នៅតែ​ក្រីក្រ​។​

នៅ​ឆ្នាំ​២០១៨ ត្រូវបាន​លោក សម រង្ស៊ី អតីត​ប្រធាន​គណបក្ស​សង្គ្រោះ​ជាតិ បញ្ជាក់ថា មិន​ត្រឹម​តែមាន​ចរន្ត​នៃ​ការផ្លាស់ប្តូរ​អំណាច​នោះទេ តែ​ក៏មាន​ចរន្ត​នៃ​ការផ្លាស់ប្តូរ​ធនធានមនុស្ស​ពី​គណបក្ស​ប្រជាជន​កម្ពុជា​ចូលទៅក្នុង​គណបក្ស​សង្គ្រោះ​ជាតិ​ផងដែរ​។ លោក សម រង្ស៊ី បាន​បន្ថែមថា ការពិតទៅ​ធនធានមនុស្ស​គណបក្ស​សង្គ្រោះ​ជាតិ​ក៏មាន​ច្រើន​ដែរ តែ​នៅពេល​ធនធានមនុស្ស​ល្អៗ​ពី​គណបក្ស​ប្រជាជន​កម្ពុជា​រួបរួមគ្នា​ថែមទៀត​នឹង​នាំ​ឲ្យ​គណបក្ស​សង្គ្រោះ​ជាតិ​កាន់តែ​រឹងមាំ​ទាំង​ផ្នែក​បរិមាណ និង​គុណភាព​នយោបាយ​ដឹកនាំ​។​

អតីត​ប្រធាន​គណបក្ស​សង្គ្រោះ​ជាតិ លោក សម រង្ស៊ី បាន​សង្កត់ធ្ងន់ថា ការពិតទៅ​មាន​មន្ត្រីរាជការ និង​កងកម្លាំងប្រដាប់អាវុធ​ជាច្រើន​បាន​ផ្លាស់ប្តូរ​ទៅ​គាំទ្រ​គណបក្ស​សង្គ្រោះ​ជាតិ និង​ឈប់​គាំទ្រ​គណបក្ស​ប្រជាជន​កម្ពុជា​រួចហើយ​។ តែ​ពួកគាត់​មិនទាន់​ហ៊ាន​ចេញមុខ​នៅឡើយ ព្រោះ​ខ្លាច​បាត់បង់​អំណាច និង​ផលប្រយោជន៍ ខណៈ​គណបក្ស​ប្រជាជន​កម្ពុជា​មិន​ត្រឹមតែ​គាបសង្កត់​ឲ្យ​ប្រជាពលរដ្ឋ​គាំទ្រ​ខ្លួន​នោះទេ តែ​ពួកគេ​ក៏​គាបសង្កត់​មន្ត្រីរាជការ និង​កងកម្លាំងប្រដាប់អាវុធ​ផងដែរ​។  លោក សម រង្ស៊ី បាន​បន្ថែមថា ប្រជាពលរដ្ឋ​គាំទ្រ​គណបក្សនយោបាយ​ដែល​ស្អាតស្អំ និង​មាន​សមត្ថភាព​ដឹកនាំ​ប្រទេស​ជា​វិជ្ជមាន ហើយ​ពួកគាត់​នឹងមិន​គាំទ្រ​ដាច់ខាត​ចំពោះ​គណបក្សកាន់អំណាច​សព្វ​ថ្ងៃ ដែល​ចេះតែ​គាបសង្កត់ ហើយ​មិន​ដោះស្រាយ​បញ្ហា​ជូន​ប្រជាពលរដ្ឋ និង​ប្រទេសជាតិ​ដែល​បណ្តែតបណ្តោយ​ឲ្យ​បញ្ហា​ទាំងនោះ​ធ្លាក់ចុះ​ក្នុងស្ថានភាព​កាន់តែ​ដុនដាប​ទៅៗ​៕

14329912_1191731404216924_1548358069164439338_n

Source link