ព័ត៌មានខ្មែរ

មេដឹកនាំ​កម្ពុជា​រំពឹងថា ​កម្មករ​នឹង​បោះឆ្នោត​ឲ្យ​លោក​ ហើយ​អាមេរិក​នឹង​លុបបំណុល​ដែល​កម្ពុជា​ជំពាក់


នៅ​មុន​ការ​រំលាយ​គណបក្ស​ប្រឆាំងកាល​ពី​ថ្ងៃព្រហស្បតិ៍ទី​១៦ ខែ​វិច្ឆិកា ​លោក​នាយករដ្ឋមន្ត្រី​ ហ៊ុន សែន​ បាន​រំឭក​ឡើង​វិញ​ពី​ប្រវត្តិសាស្ត្រ​នៃ​សង្គ្រាម​ក្នុង​ស្រុក ​ដែល​បាន​កើត​ឡើង​ក្នុង​របប​លោក​សេនា​ប្រមុខ ​លន់ នល់​ ក្នុង​ទសវត្សរ៍​ឆ្នាំ​១៩៧០។​ លោក​ក៏​រំពឹង​ថា​ សហរដ្ឋ​អាមេរិក​ក៏​នឹង​ទម្លាក់​ចោល​បំណុល​ ដែល​កម្ពុជា​បានជំពាក់​អាមេរិក​ផង​ដែរ។​

លោក​ ​ហ៊ុន សែន​ ​នៅ​ថ្ងៃ​ព្រហស្បតិ៍​នេះ​ ​បាន​ឲ្យ​ដឹង​ពី​ក្តី​រំពឹង​របស់​លោក​ថា​ កម្មករ​រោងចក្រ​នឹងបោះឆ្នោត​ ​ឲ្យ​លោក​បាន​ស្ថិត​ក្នុង​អំណាច ​១០​ឆ្នាំ​ ​បន្ត​ទៀត​ ​ដើម្បី​បើក​ផ្លូវឲ្យ​លោក​បាន​ថែរក្សា​សន្តិភាព​ ក្នុង​ប្រទេស​សម្រាប់​ការ​អភិវឌ្ឍ។​

​ថ្លែង​ក្នុង​ពិធី​ជួបជុំ​ជាមួយ​ក្រុម​កម្មករ​រោងចក្រ​ស្ថិត​ក្នុងតំបន់​ឧស្សាហកម្មមួយ​កន្លែង​នៅ​ស្រុក​ខ្សាច់​កណ្តាល​ ខេត្ត​កណ្តាល​ លោក​នាយករដ្ឋមន្ត្រី​ ហ៊ុន​ សែន​ ដែល​ស្ថិត​ក្នុង​អំណាច​ជាង​ ​៣០​ឆ្នាំ​បាន​រៀបរាប់ពី​ការលះបង់​ពេលវេលា​ជាង​ពាក់​កណ្តាល​ជីវិត​របស់​លោក ​ដើម្បី​នាំ​សន្តិភាព​ពេញលេញ​មក​ដល់​កម្ពុជា​ ដែល​ធ្លាប់​រង​ការ​ខ្ទេច​ខ្ទាំ​ដោយ​សង្គ្រាម​ក្នុង​ស្រុក។​ លោក​បាន​អះអាង​ថា​ ​លោក​បាន​បម្រើប្រទេស​កម្ពុជា​ តាំង​ពី​ប្រជាជន​ខ្មែរ​ចំនួន​ប្រមាណ​៥លាន​នាក់​ខ្វះ​ស្បៀង​ហូបចុក​ រហូត​ដល់​ប្រទេស​នេះ​មាន​ស្បៀង​ហូបចុក​គ្រប់​គ្រាន់​ ​ខណៈ​ដែល​ចំនួន​ប្រជាជន​បាន​កើន​ឡើង​ដល់​ ១៥​លាន​នាក់។​

លោក​ ហ៊ុន សែន​ បាន​ថ្លែង​ពី​ក្តី​រំពឹង​របស់​លោក​ចំពោះ​ ​ការ​សម្រេច​ចិត្ត​របស់​កម្មករ​ ​យ៉ាង​ដូច្នេះ៖​

«តាំង​ពី​ប្រជាជន​ដែល​នៅ​សេស​សល់​ពី​ការ​ស្លាប់​ ​ប្រមាណ​ ​៥លាននាក់​អត់​អង្ករ​ស៊ី​ ​ឥឡូវ​ជាង​១៥​លាន​នាក់​ សល់​អង្ករ​ ដោយ​ក្តី​មោទនភាព​ ដែល​ពូ​បាន​រួម​ដំណើរ​ជាមួយ​ជីដូន​ជីតា​ ​ឪពុក​ម្តាយ​ ​និង​មក​ដល់​ក្មួយៗ​ ហើយ​សង្ឃឹម​ថា​ ជីដូន​ជីតា​ ឪពុក​ម្តាយ​ក្មួយៗ​ ​ក៏​ដូច​ជា​ ក្មួយៗ​ផ្ទាល់​ ​នឹង​បន្ត​ការ​បោះឆ្នោត​ គាំទ្រ​គណបក្ស​ប្រជាជន​ និង​ផ្តល់​ឱកាស​ឲ្យ​ពូ​ធ្វើ​នាយករដ្ឋមន្ត្រី​បន្ត​ ១០​ឆ្នាំ​តទៅ​ទៀត»។​

លោក​នាយករដ្ឋមន្ត្រី​ ហ៊ុន សែន​ ដែល​ជា​អតីត​កម្មាភិបាល​ខ្មែរ​ក្រហមមួយ​រូប​ និង​ត្រូវ​បាន​លើក​បន្តុប​ពី​រដ្ឋាភិបាល​ទីក្រុង​ហាណូយ​ ​ឲ្យ​ដឹកនាំ​ប្រទេស​កម្ពុជា​ ​បាន​អំពាវនាវ​ជា​ថ្មី​ម្តង​ទៀតឲ្យប្រជា​ពលរដ្ឋ​ខ្មែរ​គ្រប់​ស្រទាប់​វណ្ណៈ​ប្រឆាំង​ការ​ជ្រៀតជ្រែក​ពី​បរទេស​ ដែល​លោក​យល់​ថា ធ្លាប់​បាន​ធ្វើ​ឲ្យ​ប្រទេស​ធ្លាក់​ក្នុង​វិនាសកម្ម។​

​ដោយ​ភ្ជាប់​ពី​ការ​ថ្លែង​របស់​លោក​អំពី​ការ​ជ្រៀត​ជ្រែក​ពី​បរទេស​នេះ​ លោក​ ហ៊ុន សែន​ ​បាន​លើក​ឡើងអំពី​ការ​កើត​មាន​សង្គ្រាម​ក្នុង​ស្រុក​ នៅ​ពេល​កម្ពុជា​ស្ថិត​ក្រោម​ការ​គ្រប់គ្រង​របស់​លោក​សេនាប្រមុខ​ លន់​ នល់​ ដែល​ទទួលការ​គាំទ្រ​ពី​សហរដ្ឋ​អាមេរិក។​ លោក​ថា​ ​របប​លោក​ លន់ នល់​ នេះ​ ​បាន​ធ្វើ​ឲ្យ​កម្ពុជា​ជំពាក់បំណុល​ ដែល​កម្ពុជា​មិន​ត្រូវ​សង​ ហើយ​សហរដ្ឋ​អាមេរិក​ទៅ​វិញ​ទេ​ ដែល​គួរ​ប្រើប្រាស់​បំណុល​នេះ​ ដើម្បី​រួម​ចំណែក​ដល់​ការ​អភិវឌ្ឍ​ប្រទេស​កម្ពុជា។​ លោក​បាន​អះអាង​នៅ​ចំពោះមុខ​កម្មករ​ថា​ លោក​បាន​លើកឡើង​ពី​បញ្ហា​នេះ​ នៅ​ចំពោះ​មុខ​ប្រធានាធិបតី​សហរដ្ឋ​អាមេរិក​ លោក​ Donald Trump ​ក្នុង​កិច្ច​ប្រជុំ​កំពូល​អាស៊ាន​មួយ​ ធ្វើ​ឡើង​ ​នៅ​ទីក្រុង​ម៉ានីល​ ​ប្រទេស​ហ្វីលីពីន​កាល​ពី​ពេល​ថ្មីៗ​នេះ។

«ខ្ញុំ​បាន​ស្នើសុំ​ឲ្យ​អាមេរិក​ បង្វែរ​បំណុល​ដែល​ពួក​ លន់ នល់​ ជំពាក់​ទៅ​ជា​ជំនួយ​អភិវឌ្ឍន៍​ សម្រាប់​កម្ពុជា​វិញ។ ខ្ញុំ​បាន​ប្រើ​ពាក្យ​ថា​ វា​ប្រៀប​ដូច​ជា​ យក​ញញួរ​មក​វាយ​យើង​ខ្ញុំ​ ហើយ​ឲ្យ​យើង​ខ្ញុំ​សង​ថ្លៃ​ញញួរ​ទៀត»។​

លោក​ David Josar ​អ្នក​នាំ​ពាក្យ​ស្ថានទូត​សហរដ្ឋ​អាមេរិក​នៅ​កម្ពុជា​ ​បាន​ឆ្លើយ​តប​នឹង​សំណួរ​របស់​ VOA ​តាម​សារ​អេឡិចត្រូនិក​ ឬ​ email ​ថា​ ស្ថានទូត​មិន​មាន​ការ​អធិប្បាយ​លើ​បញ្ហា​បំណុល​នេះ​ទេ។ ​លោក​បាន​សរសេរ​ក្នុង​ន័យ​ដើម​ថា៖​

«យើង​នឹង​មិន​មាន​ការ​អធិប្បាយ​ណាមួយ​ទៅ​លើ​ការ​អធិប្បាយ​របស់​លោក​នាយក​រដ្ឋមន្ត្រី​អំពី​បំណុល​អាមេរិក»។​

យ៉ាង​ណា​ក្តី​លោក​ ​ហ៊ុន សែន​ ​បាន​បញ្ជាក់​ប្រាប់​ក្រុម​កម្មករ​ឲ្យដឹង​ទៀត​ថា​ លោក​បាន​សុំ​ទោស​លោក​ប្រធានាធិបតី​ ត្រាំ​ ក្រោយ​ពី​ការ​អធិប្បាយ​របស់​លោក​ក្នុង​កិច្ច​ប្រជុំ​អាស៊ាន​កាលពី​ពេល​ថ្មីៗ​នេះ។ ​លោក​អះអាង​ថា លោក​ត្រាំ​ បាន​ឆ្លើយ​តប​នឹង​លោក​ថា មិន​មាន​បញ្ហា​អ្វី​ក្នុង​ការណ៍​ដែល​លោក​លើក​អំពី​បញ្ហា​បំណុល​នេះ។​

​លោក ​ហ៊ុន សែន​ បាន​រៀបរាប់​យ៉ាង​ដូច្នេះ៖

«និយាយ​ចប់​ ពេល​បិទ​អង្គប្រជុំ​ ខ្ញុំ​បាន​មក​ជួប​ចាប់​ដៃ​គាត់​ ខ្ញុំ​បាន​និយាយ​ថា​ សុំទោស។ ខ្ញុំ​មិន​ប្រើ​ពាក្យ​សុំ​ទោស​ទេ​ ពាក្យ​ sorry ​គេ​ប្រើ​ពាក្យ​ មិន​មែន​ជា​ការ​សោក​ស្តាយ​ទេ​ ប៉ុន្តែ​អា​នេះ​ ភាសា​ការ​ទូត​ អង់គ្លេស​របស់​ខ្ញុំ​វា​មិន​ច្បាស់​ទេ​ ខ្ញុំ​បាន​និយាយ​ថា​ ‘Sorry, I raised this issue.’ គាត់​បាន​ឆ្លើយ​ជាមួយ​ខ្ញុំ​ថា​ ‘No problem, thank you.’ គាត់​ឆ្លើយតប​ថា​ ‘អត់​បញ្ហា​ សូម​អរគុណ’។ អីចឹង​មាន​ន័យ​ថា​ គាត់​ស្តាប់​យ៉ាង​ច្បាស់»។​

ការ​រំពឹង​ទុក​របស់​លោក​ ហ៊ុន សែន​ ប្រធាន​គណបក្ស​ប្រជាជន​កម្ពុជា​ ចំពោះ​សំឡេង​គាំទ្រ​ពី​ក្រុម​កម្មករ​ កើត​មាន​ឡើង​ នៅ​ពេល​ប្រទេស​កម្ពុជា​កំពុង​ឈាន​ទៅ​រក​ការ​បោះឆ្នោត​ជាតិ​នៅ​ឆ្នាំ​ ២០១៨​ និង​នៅ​មុន​ពេល​ដែល​តុលាការ​កំពូល​កម្ពុជា​បាន​សម្រេច​រំលាយ​គណបក្ស​សង្គ្រោះ​ជាតិ​ ដែល​គេ​ដឹង​ថា​ ជា​គណបក្ស​ប្រជែង​ដ៏​សំខាន់​ ជាមួយ​គណបក្ស​ប្រជាជន​កម្ពុជា។​

ក្រុម​អ្នក​តាម​ដាន​ស្ថានការណ៍​នយោបាយ​កម្ពុជា​យល់​ថា​ លោក​នាយករដ្ឋមន្ត្រី​ ហ៊ុន​ សែន កំពុង​ធ្វើ​យុទ្ធនាការ​ឃោសនា​នយោបាយ​សម្រាប់​គណបក្ស​ប្រជាជន​កម្ពុជា​របស់​លោក​ ដោយ​បានយក​ប្រៀប​លើ​គូ​ប្រកួត​ប្រជែង​របស់​គណបក្ស​លោក គឺ​គណបក្ស​ប្រឆាំង​ដែលត្រូវ​បាន​រំលាយ​ចោល​នៅ​ថ្ងៃ​ទី​ ១៦​ ខែ​វិច្ឆិកា​ ឆ្នាំ​ ២០១៧​ ​នេះ។​

លោក​ យឿង សុធារ៉ា​ មន្រ្តី​ច្បាប់​ ​និង​អង្កេត​នៃ​អង្គការ​ឃ្លាំ​មើល​ការ​បោះឆ្នោត​នៅ​កម្ពុជា​ ហៅ​កាត់​ថា​ ខុមហ្វ្រែល​ ​បាន​ប្រាប់​ ​VOA​ នៅ​ថ្ងៃ​ព្រហស្បតិ៍​នេះ​ថា​ ការ​ឃោសនា​នយោបាយ​ទាញ​រក​សំឡេង​ឆ្នោត​នៅ​មុន​អំឡុង​ពេល​នៃ​ការ​បោះឆ្នោត​ ជា​សិទ្ធិ​របស់​អ្នកនយោបាយ។​ តែ​លោក​ថា​ លំហ​នៃ​ការ​ឃោសនា​នេះ​ គួរ​ត្រូវ​បាន​ផ្តល់​ឲ្យ​ស្មើ​ភាព​ដល់​គណបក្ស​ដទៃ​ទៀត​ ដើម្បី​បញ្ជាក់​ថា​ ការ​បោះឆ្នោត​ដែល​នឹង​ធ្វើ​ឡើង​នៅ​ពេល​ខាង​មុខ នឹង​ត្រូវ​រៀបចំ​ឡើង​ដោយ​សេរី​ ត្រឹមត្រូវ​ និង​យុត្តិធម៌។​

«វេទិកា​ ឬក៏លំហរប្រជាធិប​តេយ្យ​ទាំង​អស់​នេះ​ ត្រូវ​បើក​ឲ្យ​ស្មើគ្នា​ ចំពោះ​គ្រប់​មេដឹកនាំ​ អ្នក​នយោ​បាយ​ គ្រប់​និន្នាការ​ ទោះ​បី​ជា​និន្នា​ការ​ប្រឆាំង​ និន្នាការ​យ៉ាង​ម៉េចក៏ដោយ​ គឺត្រូវ​តែបើក​ space [លំហរ]​ បើក​អាលំហរ​ហ្នឹង​ឲ្យបាន​ស្មើៗ​គ្នា​ មានន័យ​ថា​ ធ្វើឲ្យបាន​ប្រសើរ​ មានន័យ​មិនមែន​ វាយ​ដៃ​គូ​ម្ខាង​ឲ្យ​ដួល​ ហើយ​ខ្លួន​មាន​ឱកាស​តែ​ម្នាក់​ឯង​ ដើម្បី​ប្រកូកប្រកាស​ ដើម្បី​បញ្ចេញ​សំឡេង​ តែម្នាក់​ឯង​ ដើម្បី​ទាក់​ទាញការ​គាំទ្រ​ ហើយ​មិន​អនុញ្ញាត​ឲ្យ​គេ​ធ្វើ​ដែរ​ គឺ​មិន​ជា​ការប្រកួត​ប្រជែង​ដោយ​ស្មើ​ភាព​គ្នា​ទេ​បាទ»។​

​ស្រប​ពេល​ដែល​លោក​នាយករដ្ឋមន្ត្រី​ ហ៊ុន សែន​ បាន​អំពាវនាវ​ឲ្យ​សហរដ្ឋ​អាមេរិក​ ​ទម្លាក់​បំណុល​ដែល​កម្ពុជា​ជំពាក់​ និង​នៅ​មុន​ពេល​តុលាការ​កំពូល​ប្រកាស​រំលាយ​ចោល​គណបក្ស​សង្គ្រោះ​ជាតិ​ ស្ថានទូត​សហរដ្ឋ​អាមេរិក​បាន​បង្ហោះ​សារ​ជូន​ដំណឹង​មួយនៅ​លើ​ ​ទំព័រ​ហ្វេសប៊ុករបស់​ខ្លួន​នៅ​ព្រឹក​ថ្ងៃ​ព្រហស្បតិ៍​នេះ ដោយ​បាន​បញ្ជាក់​ថា​ ការិយាល័យ​អ្នក​តំណាង​ពាណិជ្ជកម្ម​សហរដ្ឋ​អាមេរិក​ ហៅ​កាត់​ថា​ (USTR)​ បាន​ប្រកាស​ពី​កិច្ច​ខិត​ខំ​ថ្មី​មួយ​ ដើម្បី​ធានា​ដល់​ប្រទេស​ ដែល​ទទួល​ផល​ប្រយោជន៍​ទាំងឡាយ​ឲ្យ​បំពេញ​បាន​នូវ​តម្រូវការ​របស់​កម្មវិធី​ប្រព័ន្ធ​អនុគ្រោះ​ពាណិជ្ជកម្ម​ទូទៅ​ (Generalized System of Preference) ​ហៅ​កាត់​ថា​ GSP។​ ដំណើរការ​ថ្មី​នេះ​ ​មាន​ការពាក់ព័ន្ធ​នឹង​ការ​វាយ​តម្លៃ​របស់​ USTR ​ទៅ​លើ​ប្រទេស​ដែល​ទទួល​បាន​ប្រយោជន៍​ពី​កម្មវិធី​ GSP។​ ស្ថានទូត​សហរដ្ឋ​អាមេរិក​នៅ​កម្ពុជា​ បាន​បញ្ជាក់​ថា​ ប្រទេស​កម្ពុជា​បាន​ក្លាយ​ជា​ប្រទេស​ទទួល​ផលប្រយោជន៍​ពី​កម្មវិធី​ GSP​ នៅ​ឆ្នាំ​ ១៩៩៧​ និង​នៅ​ឆ្នាំ​២០១៦​ កម្ពុជា​បាន​នាំ​ចេញ​ក្នុង​ទឹកប្រាក់​ចំនួន​ ១៧៩​លាន​ដុល្លារ​អាមេរិក​ទៅ​កាន់​សហរដ្ឋ​អាមេរិក​ នៅ​ក្នុង​កម្មវិធី​នេះ។ ​

លោក ​David Josar ​អ្នក​នាំពាក្យ​ស្ថានទូត​សហរដ្ឋ​អាមេរិក​នៅ​កម្ពុជា​ ​បាន​បដិសេធ​មិន​ផ្តល់​ការ​អធិប្បាយ​ ​ទាក់​ទិន​ការ​ពិនិត្យ​ឡើង​វិញ​ទៅ​លើ​ប្រទេស​ដែល​ទទួល​បាន​ប្រយោជន៍​ពី​កម្មវិធី​ GSP​ ​នេះ​ ដោយ​បាន​បង្វែរ​សំណួរ​ទៅ​ការិយាល័យ​អ្នក​តំណាង​ពាណិជ្ជកម្ម​សហរដ្ឋ​អាមេរិក​ ដែល​មិន​ទាន់​បាន​ឆ្លើយ​សំណួរ​របស់​ VOA ​មកដល់​ល្ងាច​ថ្ងៃ​ព្រហស្បតិ៍​នេះ៕

Source link

បទ​ចោទប្រកាន់​បៀតបៀន​ផ្លូវ​ភេទ​ធ្វើ​ឲ្យ​កក្រើក​ការ​ប្រជែង​តំណែង​សមាជិក​ព្រឹទ្ធសភា​អាមេរិក


លោក Roy Moore បាន​បង្កើត​អាជីព​ពី​ការ​រិះគន់អ្វី​ដែល​លោក​យល់ឃើញ​ថា​ ជា​បញ្ហា​ញាំញី​នៅ​អាមេរិក ជាពិសេស​ពាក់ព័ន្ធ​នឹង​រឿង​ផ្លូវ​ភេទ។

លោក Roy Moore ដែល​ជា​បេក្ខជន​សមាជិក​ព្រឹទ្ធសភា​មក​ពី​គណបក្ស​សាធារណរដ្ឋ​បាន​និយាយ​ថា៖

«ភាព​អសីលធម៌ ការ​រំលូតកូន ការ​រួមភេទ​តាម​រន្ធគូថ អំពើ​លីលា​ខាង​ផ្លូវ​ភេទ​កំពុង​តែ​កើត​មាន​ពាសពេញ​ទឹកដី​របស់​យើង»។

ឥឡូវ​នេះ ស្រ្តី​មួយ​ចំនួន​បាន​ចោទប្រកាន់​លោក​ Mooreពី​ការ​ប្រព្រឹត្ត​អំពើ​បៀតបៀន​ផ្លូវ​ភេទ​លើ​ពួកគេ​ កាល​ពី​ពីរបី​ទសវត្សរ៍​មុន នៅ​ពេល​ដែល​ពួកគេ​ស្ថិត​នៅ​ក្នុង​វ័យ​ជំទង់ ហើយ​លោក Moore ស្ថិត​នៅ​ក្នុង​វ័យ ៣០​ឆ្នាំ។

លោក Jeff Flake សមាជិក​ព្រឹទ្ធសភាមក​ពី​គណបក្ស​សាធារណរដ្ឋ​បាន​និយាយ​ថា៖

«រឿង​នេះ​ពិត​ជា​គួរ​ឲ្យ​ស្អប់ខ្ពើម​ណាស់»។

សមាជិក​គណបក្ស​សាធារណរដ្ឋ ដែល​មានទំនោរ​នឹង​បង្ហាញ​ពី​សំណើ​កាត់​បន្ថយ​ពន្ធដារ​ ត្រូវ​បង្ខំ​ចិត្ត​ចេញ​មក​និយាយ​ពី​រឿង​នេះ។

«ប្រសិន​បើ​មាន​ការ​ពិត​នៅ​ក្នុង​រឿង​នេះ​ គាត់ [លោក Moore] ត្រូវ​តែ​ដក​ខ្លួន​ចេញ​ ហើយ​ [ត្រូវ​តែ​ធ្វើ​] ឥឡូវ​នេះ»។

លោក Moore ដែល​ជា​អតីត​ចៅ​ក្រម​តុលាការ​កំពូល​ប្រចាំ​រដ្ឋ ត្រូវ​បាន​ដក​ចេញ​ពី​តំណែង​ចំនួន​ពីរ​ដង។ ទី​មួយគឺ​នៅ​ពេល​ដែល​លោក​បដិសេធ​មិន​ដក​ចេញ​រូប​សំណាក​វិន័យ​ព្រះ​ Ten Commandments ពី​អគារ​សាធារណៈ​មួយ។ បន្ទាប់​មក​គឺ​នៅ​ពេល​ដែល​លោក​បដិសេធមិន​ទទួល​ស្គាល់ការ​ដាក់​ឲ្យ​ស្រប​ច្បាប់​នូវ​ការ​រៀបការ​រវាង​អ្នក​មាន​ភេទ​ដូចគ្នា​នៅ​សហរដ្ឋអាមេរិក។ ឥឡូវ​នេះ លោក​ជា​បេក្ខជន​ប្រជែង​តំណែង​ក្នុង​ព្រឹទ្ធសភា ហើយ​យុទ្ធនាការ​របស់​លោក Moore កំពុង​តែ​ជួប​ប្រទះ​វិបត្តិ។

លោក​ Roy Moore បាន​មាន​ប្រសាសន៍​ថា៖

«ខ្ញុំ​មិន​ដែល​ប្រព្រឹត្ត​មិន​គប្បី​លើ​ផ្លូវ​ភេទ​ជាមួយ​នរណា​ម្នាក់​ទេ… មុន​ពេល​បោះឆ្នោត​ ដែល​នាំ​ឲ្យ​មាន​ការ​ចោទប្រកាន់​ដូច​គ្នា​នេះ គឺ​ពិត​ជា​មិន​គួរ​ឲ្យ​ជឿ»។

មន្រ្តី​ក្នុង​ជួរ​បក្ស​របស់​លោក​ត្រាំ​មិន​បាន​បោះបង់​លោក Moore ចោល​ទេ។

អ្នក​ស្រី Kellyanne Conway ទីប្រឹក្សា​លោក​ប្រធានាធិបតី​ត្រាំ​បាន​និយាយថា

«វា​នឹង​ជា​រឿង​មិនធ្លាប់​មាន​ពី​មុន​មក​ដ៏​គ្រោះថ្នាក់​មួយ​សម្រាប់​យើង​គ្រប់​គ្នា មិន​ថា​នរណា​ម្នាក់​ទេ នៅ​ក្នុង​ប្រទេស​នេះ គឺ​ថា នឹង​ត្រូវ​រង​ការ​កាត់​ផ្តាច់​ចេញ​ ដោយ​សារ​តែ​របាយការណ៍​សារព័ត៌មាន។ នេះ​ជា​លទ្ធិ​ប្រជាធិបតេយ្យ​ អាស្រ័យ​រដ្ឋ​ធម្មនុញ្ញ»។

ប៉ុន្តែ​សមាជិក​ព្រឹទ្ធសភា​មក​ពី​គណបក្ស​សាធារណរដ្ឋ​បាន​សម្រុក​ទៅ​បង្ហោះ​សារ​នៅ​លើ​បណ្តាញ​សង្គម​ទ្វីធឺ​ ដោយ​មាន​មួយ​ចំនួន​ដក​ខ្លួន​ពី​ការ​គាំទ្រ​លោក Moore ហើយ​មួយ​ចំនួន​ទៀត​អំពាវនាវ​ឲ្យ​លោក​ដក​ខ្លួន​ចេញ​ពី​ការ​ប្រជែង​យក​តំណែង​សមាជិក​ព្រឹទ្ធសភា។

ដៃ​គូ​ប្រជែង​របស់​លោក​ពី​គណបក្ស​ប្រជាធិបតេយ្យ​ក៏​បាន​បញ្ចេញ​សំឡេង​ផង​ដែរ៖

លោក Doug Jones បេក្ខជន​សមាជិក​ព្រឹទ្ធសភា​មក​ពី​គណបក្ស​ប្រជាធិបតេយ្យ​បាន​និយាយ​ថា៖

«នេះ​ជា​បញ្ហា​របស់​គាត់។ គាត់​ត្រូវតែ​ដោះស្រាយ​បញ្ហា​នោះ ហើយ​ប្រជាពលរដ្ឋ​នៅ​រដ្ឋ Alabama ត្រូវ​ការ​ចម្លើយ»។

សមាជិក​គណបក្ស​សាធារណរដ្ឋកាន់​កាប់​កៅអីមួយ​ភាគ​ធំ ដោយ​មាន​លើស​កៅអី​ចំនួន​ពីរ​នៅ​ក្នុង​ព្រឹទ្ធសភា ដែល​សំឡេង​នេះ​ចែក​ជា​ពីរ ប្រសិន​បើ​សមាជិក​គណបក្ស​ប្រជាធិបតេយ្យ​ឈ្នះ​នៅ​រដ្ឋ Alabama ដែល​ជា​រដ្ឋ​ដែល​មាន​ប្រជាជន​ភាគ​ច្រើន​គាំទ្រ​គណបក្ស​សាធារណរដ្ឋ។

លោក Tom Perez ប្រធាន​គណៈកម្មាការ​ជាតិ​ប្រជាធិបតេយ្យ​ (Democratic National Committee) ដែល​គ្រប់គ្រង​គណបក្ស​ប្រជាធិបតេយ្យ​នៅ​អាមេរិក បាន​និយាយ​ថា៖

«សមាជិក​គណបក្ស​ប្រជាធិបតេយ្យ​អាច​ប្រកួត និង​ឈ្នះ​គ្រប់​ទី​កន្លែង»។

ខណៈ​ដែល​សមាជិក​គណបក្ស​ប្រជាធិបតេយ្យ​កំពុង​តែពង្រឹង​ខ្លួន សមាជិក​ព្រឹទ្ធសភា​មក​ពី​គណបក្ស​សាធារណរដ្ឋ​កំពុង​ប្រឈម​ជាមួយ​នឹង​ការ​ពិត​មួយ​ ដែល​នោះ​គឺ ពួកគេ​អាច​បាត់បង់​កៅអី​ព្រឹទ្ធសភា​ ឬ​ត្រូវ​ចូលរួម​ជាមួយ​នឹង​បុរស​ម្នាក់​ ដែល​សមាជិក​មួយ​ចំនួន​នៅ​ក្នុង​ជួរ​បក្ស​ខ្លួន​ប្រកាស​ថា មិន​សម​នឹង​ចូល​បម្រើការ៕

ប្រែសម្រួលដោយណឹម សុភ័ក្រ្តបញ្ញា

Source link

ឡាន​ឧកញ៉ា​ហ៊ុន​តូ​តម្លៃ​ជាង​១​លាន​ដុល្លារ ជួប​គ្រោះថ្នាក់​ចរាចរ​របួស​ម​នុស្ស​៥​នាក់​ | មាតុភូមិ

ឡាន​ឧកញ៉ា​ហ៊ុន​តូ​តម្លៃ​ជាង​១​លាន​ដុល្លារ ជួប​គ្រោះថ្នាក់​ចរាចរ​របួស​ម​នុស្ស​៥​នាក់​

car-hun-to

​កោះកុង ៖​មាន​ករណី​គ្រោះថ្នាក់​ចរាចរ​មួយ​កើតឡើង​កាលពី​កាលពី​វេលា​ម៉ោង ២៣ និង ២៥​នាទី យប់​ថ្ងៃទី​១៤ ខែវិច្ឆិកា ឆ្នាំ​២០១៧​នៅ​ផ្លូវជាតិ​លេខ​៤៨​ក្នុងភូមិ​សាស្ត្រ​ស្រុក​បុ​ទុម​សាគរ ម្តុំ​ជិត​ផ្លូវបំបែក​ទៅ​កោះ​ស្តេច ខេត្តកោះកុង​បណ្តាល​ឲ្យ​មាន​មនុស្ស​រងរបួស​៥​នាក់​ខូចខាត​រថយន្ត​៣​គ្រឿង​ដេ​ល​ក្នុងនោះ​មាន​រថយន្ត​១​គ្រឿង​មានតម្លៃ​ជាង​១​លាន​ដុល្លារ​អាមេរិក​។

​សេចក្តី​រាយ​ការ​ឲ្យ​ដឹងថា​៖​គ្រោះថ្នាក់​ចរាចរ​នេះ​គឺ​​រថយន្ត ទ្រុង មួយគ្រឿង ដែល​ផ្ទុក ដឹក​រថយន្ត​ទំនើប​មួយគ្រឿង​មានតម្លៃ​ជាង​១​លាន​លាន​ដុល្លារ​អ​មេ​រិ​ក​ដែល​គេ​ថា​ជា​កម្ម​សិទ្ធ របស់ ឧកញ៉ា ហ៊ុន​តូ  បាន​បុក ជាមួយ រថយន្ត​ដឹកទំនិញ មួយគ្រឿង ពេញទំហឹង បណ្តាល​ឲ្យ រថយន្ត​ដឹកទំនិញ ក្រឡាប់​ផ្ញា​ជើង​រងរបួស់ ធ្ងន់​ស្រាល ៥​នាក់  ចំណែក រថយន្ត​មានតម្លៃ ជាង ១​លាន​ដុល្លារ​នោះបាន​រង​ការខូចខាត​ផ្នែក​ខាងមុខ​ធ្ងន់ធ្ងរ​។​

​រថយន្ត​ធន់​ធំ​ពី គ្រឿង​មួយ គ្រឿង ម៉ាក អ៊ី​ស៊ុយ​ស៊ុយ ១​គ្រឿង ពាក់​ស្លាក​លេខ ថៃ ៦២. ៦២៦២ បើកបរ​ដោយ​ជនជាតិ​ថៃ ផ្ទុក​រថយន្ត មួយគ្រឿង សេរី​ទំនើប មួយគ្រឿង​ម៉ាក​អ៊ី​ពែរ​ខា​ម៉ាក់​គ្លែ​រ៉ឹ​ន​ប៉េ​១(Hypercar Mclaren P1 )​ពាក់ ស្លាក​លេខ 2AY-2222 ដែលមាន​តម្លៃ​ប្រហែល​US$1,350,000    បាន ធ្វើដំណើរ​តាមផ្លូវ ជាតិ​លេខ  ៤៨  ។​នេះ​បើតាម​ប្រភព​ព​ត៏​មាន​ពី​គណនី​ហ្វេ​ស​ប៊ុ​ក​របស់លោក Vithourak Sarun​។ ចំណែក រថយន្ត​ម៉ាក​ហ៊ីយ៉ាន់ដាយ ១​គ្រឿង ពណ៌​ខៀវ ពាក់​ស្លាក​លេខ ភ្នំពេញ ៣B-៥៥៦៨ ។​

រថយន្ត​ទាំងពី​បើក​តាម​បណ្តោយ​ផ្លូវ ជាតិ​លេខ​៤៨ មាន​ទិសដៅ​ច្រាសទិស​គ្នា លុះដល់​ចំណុច ភូមិសាស្ត្រ​ស្រុក​បុ​ទុម​សាគរ ម្តុំ​ជិត​ផ្លូវបំបែក​ទៅ​កោះ​ស្តេច ក៏បាន​បុក​គ្នា​ពេញទំហឹង បណ្តាល​ឲ្យ ខ្ទេច រថយន្ត​សេរី​ទំនើប ដែល​ដឹក​នៅលើ​រថយន្ត​នោះ  ចំណែក​រថយន្ត​ដឹកទំនិញ​មួយគ្រឿង​ទៀត​បាន ក្រឡាប់​ផ្ញា​ជើង​ធ្លាក់​ផ្លូវ ។​

​ប្រភព​ដដែល​បន្តថា គ្រោះថ្នាក់​ចរាច​នោះ​បណ្តាល​ឲ្យ ឲ្យ​មនុស្ស ៥​នាក់ ក្នុងនោះ ខ្មែរ ២​នាក់ និង​ថៃ ៣​នាក់ រងរបួស​ធ្ងន់​ស្រាល បញ្ជូនទៅ​ព្យាបាល​នៅ​មន្ទីរពេទ្យបង្អែក​ស្រុកស្រែ​អំបិល រីឯ​រថយន្ត​ខូចខាត​ធ្ងន់​។ 

​ឡាន​ម៉ាក​Hypercar Mclaren P1​នេះ​ផលិត​នៅ​ប្រទេស​អង់គ្លេស​កាលពី​ឆ្នាំ​២០១៣​លក់​អស់​៣៧៥​គ្រឿង​។​តាម​ការ​ឲ្យ​ដឹង​រថយន្ត​ប្រភេទ នោះ​នៅ​ស្រុក​ខ្មែរ​ប្រហែល​មានតែ​មួយគ្រឿង​នឹង​ទេ មិនមាន​ច្រើន​ឡើយ​។​​មកដល់ពេលនេះ សមត្ថកិច្ច​នៅ​មិនទាន់ បញ្ជាក់ថា​ភាគី ខាង​ណា ជា អ្នកបង្ក​នៅឡើយ​ទេ ដោយ​សមត្ថកិច្ច​កំពុងធ្វើការ​ពិនិត្យ និង​ស្រាវជ្រាវ​។​

car-hun-tocar-hunto1car-hunto6car-hunto

Source link

អង្គការ​សិទ្ធិ​មនុស្ស​សុំ​ឱ្យ​តុលាការ​កំពូល​បង្ហាញ​ឯករាជ្យ​ភាព


អង្គការ​ឃ្លាំ​មើល​សិទ្ធិ​មនុស្ស​ ​(Human Rights Watch)​ ​នៅ​ថ្ងៃ​ពុធ​នេះ​ ​បាន​ស្នើ​ឲ្យ​តុលាការ​កំពូល​របស់​កម្ពុជា​ ​ប្រើ​អំណាច​ឯករាជ្យ​របស់​ខ្លួន​ប្រឆាំង​នឹង​សម្ពាធ​របស់​រដ្ឋាភិបាល​ ​ដែល​បាន​ស្នើ​រំលាយ​គណបក្ស​សង្គ្រោះ​ជាតិ​ ដែល​ជា​បក្ស​ប្រឆាំង​ដ៏​សំខាន់​មួយ​របស់​កម្ពុជា។​ ​នេះ​បើ​យោង​តាម​សេច​ក្តី​ថ្លែង​ការណ៍​របស់​អង្គការ​ឃ្លំា​មើល​សិទ្ធិ​មនុស្ស​ ​ដែល​មាន​មូលដ្ឋាន​នៅ​សហរដ្ឋ​អាមេរិក។​

ក្នុង​សេចក្តី​ថ្លែង​ការណ៍​ ​ដែល​បាន​បង្ហោះ​ក្នុង​ប្រព័ន្ធ​សង្គម​ ​Twitter​ ​នាថ្ងៃ​ពុធ​នេះ​ ​លោក​ ​ប្រេដ អាដាមស៍​ ​(Brad Adams)​ ​នាយក​អង្គការ​ឃ្លាំមើល​សិទ្ធិ​មនុស្ស​ប្រចាំ​តំបន់​អាស៊ី​ ​បាន​លើក​ឡើង​ថា​ តុលាការ​កំពូល​កម្ពុជា​ ​គួរ​តែ​ទប់ទល់​នឹង​សម្ពាធ​របស់​រដ្ឋាភិបាល​ ​ដើម្បី​ចេញ​សេចក្តី​សម្រេច​លើ​ការ​រំលាយ​គណបក្ស​ប្រឆាំង។​ ​លោក​ ​ប្រេដ អាដាមស៍​ ​ក៏​បាន​ស្នើ​ដល់​អ្នក​គាំទ្រ​ ​និង​ម្ចាស់​ជំនួយ​អន្តរជាតិ​របស់​កម្ពុជា​ ​នា​នា​គួរតែថ្លែង​ឲ្យបាន​ច្បាស់​ថា​ ការ​រំលាយ​គណបក្ស​សង្គ្រោះ​ជាតិ​ នឹង​ធ្វើ​ឲ្យ​ការ​បោះឆ្នោត​ជាតិ​ដែលគ្រោង​នឹង​ធ្វើ​នៅ​ឆ្នាំ​ ២០១៨​ ​គ្មានភាព​ស្រប​ច្បាប់។​

លោក​ ​ប្រេដ អាដាមស៍​ ​ត្រូវបាន​ដកស្រង់​សម្តី​តាម​ន័យ​ដើម​ថា៖​

«លោក​នាយករដ្ឋ​មន្ត្រី​ ​ហ៊ុន សែន​ ​ដូចជា​មាន​ការ​ភ័យ​ខ្លាច​ថា​ ​លោក​នឹង​ចាញ់​ការ​បោះឆ្នោត​ដែល​គ្រោង​នឹង​ធ្វើឡើង​នៅ​ឆ្នាំ​ ​២០១៨​ ​ដូច្នេះ​គាត់​បាន​ប្រើ​ជម្រើស​ដ៏​ខ្លាំងក្លា​មួយ​ដើម្បី​បំផ្លាញ​គណបក្ស​ប្រឆាំង»។​

លោក​ត្រូវបាន​ដកស្រង់​សម្តី​បន្តថា​៖ «ទោះបី​តុលាការ​កំពូល​ជាផ្នែក​មួយ​ដ៏​មាន​ប្រសិទ្ធភាព​របស់​គណបក្ស​កាន់​អំណាច​កី្ត​ ក៏​តុលាការ​នេះ​ មាន​ឱកាស​ជា​ប្រវត្តិសាស្រ្ត​ដើម្បី​បង្ហាញ​ភាព​ឯករាជ្យ​ខ្លះៗ​ និង​តម្កល់​ទុក​នីតិរដ្ឋ»។​

តុលាការ​កំពូល​របស់​កម្ពុជា​ កំពុង​ធ្វើ​ការ​លើ​រឿងក្តី​រំលាយ​គណបក្ស​ប្រឆាំង​ តាម​បណ្តឹង​របស់​ក្រសួង​មហាផ្ទៃ ហើយ​គ្រោង​នឹង​បើក​សវនាការ​នៅ​ថ្ងៃ​ទី​១៦​ ​ខែវិច្ឆិកា​ស្អែកនេះ។​ ​លោក​ ​ហ៊ុន សែន​ ​ប្រធាន​គណ​បក្ស​ប្រជាជន​កម្ពុជា​ បាន​អះអាង​នៅ​មុនការ​ចេញសេចក្តី​សម្រេច​របស់​តុលាការ​នេះ​ថា​ ​បក្ស​សង្រ្គោះ​ជាតិ​នឹង​ត្រូវ​រំលាយ​នា​ពេល​នោះ។​ ​លោក​ ហ៊ុន សែន​ ក៏បាន​អំពាវនាវ​ឲ្យ​មន្ត្រី​គ្រប់​ជាន់​ថ្នាក់​របស់​គណបក្ស​ប្រឆាំង​ចូលរួម​ជាមួយ​គណបក្ស​កាន់​អំណាច​ ដើម្បី​រក្សា​មុខ​តំណែង​ និង​តួនាទី​របស់​ខ្លួន។​

លោក​ ​អ៊ុក គឹមសិទ្ធិ​ ​អគ្គ​ព្រះ​រាជអាជ្ញារង​តុលាការ​កំពូល​ ​បាន​ច្រាន​ចោល​សំណើ​របស់​លោក​ ​ប្រេដ​ អាដាមស៍​ ​ដោយ​បាន​ថ្លែង​តុលាការ​យល់​ពីតួនាទី​ក្នុង​ការ​កាត់​ក្តី​ដោយ​គ្មាន​ការ​ជ្រៀត​ជ្រែក​ពី​ភាគី​ណា​មួយ។

លោក​បាន​ប្រាប់​ ​VOA​ ​ក្នុង​ន័យ​ដើម​ថា៖​

«​ខ្ញុំបញ្ជាក់​ជូន​ត្រឡប់​ទៅវិញ​ ទៅ​លោក​ ​Brad Adams​ ​វិញ​គឺថា​ ​តុលាការ​លោក​យល់​ពី​ ​តួនាទី​ និង​ភារកិច្ច​របស់​លោក​ហើយ​ អីចឹង​មិន​បាច់​ខាង​ លោក​ Brad Adams នឹង​មក​ ណែនាំ​ទេ»។​

អគ្គ​ព្រះរាជអាជ្ញារង​តុលាការ​កំពូល​រូបនេះ​ បាន​ថ្លែង​បន្ត​ថា​ សវនាការ​ដែលគ្រោង​ធ្វើ​នៅថ្ងៃ​ទី​ ១៦​ ខែ​វិច្ឆិកា​ ពោល​គឺនៅ​ថ្ងៃ​ស្អែកនេះ​ នឹង​ប្រព្រឹត្ត​ទៅ​ដោយ​គ្មានការ​កែប្រែ។ លោក​ អ៊ុក គឹមសិទ្ធិ​ បាន​មាន​ប្រសាសន៍​ទៀត​ថា​ តុលាការ​មិន​ព្រួយ​បារម្ភ​ពី​បញ្ហា​សន្តិសុខ​ និង​ការ​រិះគន់​ពី​មហាជន​ នៅក្នុង​កាលៈទេសៈ​ដែល​ តុលាការ​កាត់​ក្តីសម្រេច​រំលាយបក្ស​ប្រឆាំង។

លោក​ ​អ៊ុក គឹមសិទ្ធិ​ ​អគ្គ​ព្រះរាជ​អាជ្ញារង​តុលាការ​កំពូល​បាន​បន្ថែម​ថា៖​

«អានោះ​ជា​សិទ្ធិ​របស់​គាត់​ថា​បាទ។ ប៉ុន្តែ​តុលាការ​នឹង​បំពេញ​ការ​ងារ​របស់​ខ្លួន​ ទៅតាម​ក្រម​វិជ្ជាជីវៈ​ ទៅ​តាម​ច្បាប់»។​

ក្នុង​សេចក្តីថ្លែង​ការណ៍​របស់​លោក​ ប្រេដ អាដាមស៍​ មាន​ចំណង​ជើង​ថា​ «ប្រទេស​កម្ពុជា៖ លទ្ធិ​ប្រជា​ធិប​តេយ្យ​ប្រឈម​នឹង​ការ​ស្លាប់ អ្នក​ការទូត​ និង​ម្ចាស់​ជំនួយ​ចាំបាច់​ត្រូវ​ធ្វើ​សកម្មភាព​ ប្រសិនបើ​តុលាការ​រំលាយ​គណបក្ស​ប្រឆាំង»​ អ្នក​ការពារ​សិទ្ធិមនុស្ស​រូបនេះ​ បាន​លើក​ឡើង​ថា​ ការ​រំលាយ​គណ​បក្ស​ប្រឆាំង​ដែល​បាន​គ្រោង​ទុក ជា​ផ្នែកមួយ​នៃការ​បង្ក្រាប​ដ៏ធំ​របស់​លោក​ ​ហ៊ុន សែន​ ​និង​គណបក្ស​ប្រជាជន​កម្ពុជា​ ប្រឆាំង​រាល់​ទម្រង់​នៃ​ការ​រិះ​គន់​ដោយ​សន្តិវិធី។​

សេចក្តី​ថ្លែង​ការណ៍​របស់​អង្គការ​ឃ្លាំមើល​សិទ្ធិ​មនុស្ស​បាន​បញ្ជាក់​ឲ្យដឹង​ទៀត​ថា​ ​នៅ​ក្នុង​ប៉ុន្មាន​ខែ​ថ្មីៗ​នេះ​ រដ្ឋាភិបាល​បាន​បង្ខំ​ឲ្យ​មាន​ការ​បិទ​កាសែត​ The Cambodia Daily​ ស្ថានីយ៍​វិទ្យុ​ក្នុង​ស្រុក​ឯករាជ្យ​ជា​ច្រើន​ និង​ស្ថានីយ៍​ FM ដែល​ផ្សាយ​បន្ត​ វិទ្យុ​អាស៊ី​សេរី​ និង​សំឡេង​សហរដ្ឋ​អាមេរិក​ ​(VOA) ជា​ភាសា​ខ្មែរ។ ​អង្គការ​ឃ្លាំមើល​សិទ្ធិមនុស្ស​បាន​បន្ត​ឲ្យដឹង​ទៀតថា​ ​យ៉ាងហោចណាស់​មាន​សកម្មជន​ប្រឆាំង​ និង​ស៊ីវិល​ ​២០នាក់​ ​នៃ​ក្រុម​ប្រឆាំង​ និង​ស៊ីវិល​ចំនួន​ប្រមាណ​ ៣០​នាក់​ ដែល​ត្រូវ​បាន​ចាប់​ខ្លួន​តាម​អំពើ​ចិត្ត​តាំងពី​ខែ​ឧសភា​ ​ឆ្នាំ​២០១៥​ នឹង​បន្ត​ជាប់​ឃុំ​ ​ហើយ​ពួកគេ​ជាច្រើន​នាក់​នោះ​ ត្រូវបាន​យក​មក​កាត់​ក្នុង​សវនាការ​មិន​ពេញ​លេញ​ ដែល​បាន​ចាក​ឆ្ងាយ​ពី​បទដ្ឋាន​អន្តរជាតិ​នានា។​

លោក​ ​ប្រេដ​ អាដាមស៍​ ត្រូវបាន​ដកស្រង់​សម្តី​បន្ថែម​ក្នុង​ន័យ​ដើម​ថា​៖

«​លោក​ ហ៊ុន សែន​ បាន​ស្ថិត​ក្នុង​ដំណើរការ​បំផ្លាញ​ សេរីភាព​នៃការ​និយាយ​ស្តី​ដែល​មាន​លក្ខណៈ​ពហុ​និយម​ និង​ផលប្រយោជន៍​ខាង​សិទ្ធិ​មនុស្ស​ផ្សេង​ទៀត ​ចាប់​តាំងពី​ការ​ចុះ​កិច្ច​ព្រមព្រៀង​ទីក្រុង​ប៉ារីស​ ឆ្នាំ​១៩៩១»។​

លោក​បាន​ថ្លែង​បន្តទៀត​ក្នុង​ន័យដើម​ថា៖​

«ម្ចាស់​ជំនួយ និង​អ្នក​ការទូត​ទាំងឡាយ មាន​ជម្រើស​មួយៈ​ មិន​ធ្វើ​អ្វី​ទាំងអស់​ ខណៈ​ដែល​ឱកាស​សម្រាប់​លទ្ធិប្រជាធិបតេយ្យ​ត្រូវបាន​គេ​កម្ទេច​ចោល​ ឬក៏​ផ្ញើ​សារ​ថា​ នឹង​មាន​ផល​វិបាក​ខាង​ការទូត​ សេដ្ឋកិច្ច​ និង​នយោបាយ​ធ្ងន់​ធ្ងរ​ ប្រសិន​បើ​លោក​ ហ៊ុន សែន​ ទាញ​កម្ពុជា​ឲ្យ​ត្រឡប់​ទៅ​ រដ្ឋ​ដែល​ដំណើរ​ការ​ដោយ​គណបក្ស​តែមួយ»។​

ស្ថានទូត​សហរដ្ឋ​អាមេរិក​ប្រចាំ​នៅ​កម្ពុជា​ បាន​បដិសេធ​ ​មិន​ផ្តល់​ការ​អធិប្បាយ​ អំពី​វិធានការ​របស់​អាមេរិក​ ប្រសិន​បើ​គណបក្ស​ប្រឆាំង​ត្រូវ​តុលាការ​រំលាយ។​

លោក​ ​សុខ ឥសាន​ អ្នកនាំពាក្យ​គណបក្ស​ប្រជាជន​កម្ពុជា​របស់​លោក​នាយក​រដ្ឋ​មន្ត្រី​ ​ហ៊ុន សែន​ ​បាន​ថ្លែង​ថា​ ​ការ​ថ្លែង​របស់​លោក​ ប្រេដ អាដាមស៍​ គ្រាន់​តែ​ជា​ការ​បញ្ចេញ​ទស្សនៈ​ផ្ទាល់​ខ្លួន​ ​ដែល​នឹង​មិន​មាន​ឥទ្ធិពល​អ្វីទាល់​តែសោះ​លើ​អំណាច​តុលាការ​ក្នុង​ប្រទេស​កម្ពុជា។​

«ជាមតិ​របស់​គាត់​ផ្ទាល់​ ក៏ប៉ុន្តែ​ វាមិន​បាន​គ្រប់ដណ្តប់​ មក​លើ​អធិបតេយ្យ​ភាព​ ឯករាជ្យភាព​របស់​តុលាការ​កម្ពុជា​ទេ។ ហើយ​ការ​អំពាវនាវ​របស់​គាត់​ ហើយ​ការ​អំពាវនាវ​របស់​គាត់​ឲ្យតុលាការ​ហ្នឹង​ ពង្រឹង​ជំហរ​ឯករាជ្យ​ភាព​ ក្នុងការ​កាត់​សេចក្តី​នាថ្ងៃ​ស្អែក​នេះ​ ខ្ញុំ​យល់​ថា​ ជាការ​ត្រឹម​ត្រូវ​ ក៏ប៉ុន្តែ​ដល់​ចេញ​លទ្ធផល​មក​ ដោយ​ការ​កាត់​ក្តី​ដោយ​ឯករាជ្យ​របស់​តុលាការ​ហ្នឹង​ សុំកុំ​ឲ្យគាត់​ថ្នាំង​ថ្នាក់​ បើ​ពេលណា​ ដែល​មិន​ពេញចិត្ត​គាត់​ចង់បាន​នោះ​បាទ»។​

អ្នក​នាំពាក្យ​គណបក្ស​កាន់​អំណាច មិន​ផ្តល់​ការ​អធិប្បាយ​ ទាក់​ទិន​ការ​ថ្លែង​របស់​លោក​ ប្រេដ​ អាដាមស៍​ ដែល​អះអាង​ថា​ ការរំលាយ​គណបក្ស​ប្រឆាំង​ជា​ផ្នែក​មួយ​នៃ​ការ​បង្រ្កាប​លើ​សំឡេង​ជំទាស់​របស់​រដ្ឋាភិបាល​លោក​ ហ៊ុន សែន។​

ការ​ប៉ុន​ប៉ង​រំលាយ​គណបក្ស​ប្រឆាំង​ដ៏​ធំ និង​តែ​មួយ​គត់​នៅ​សភា​ជាតិ​ខ្មែរ​នេះ​ នៅ​បន្ត​ជា​ក្តី​បារម្ភ​របស់​សហគមន៍​អន្តរជាតិ​ ក៏​ដូច​ជា​អង្គការ​ឃ្លាំមើល​សកម្មភាព​ ​រំលោភ​បំពាន​សិទ្ធិ​មនុស្ស​ និង​សេរីភាព​ក្នុង​ការ​ធ្វើ​នយោបាយ​ផ្សេង​ទៀត។ ​កាលពីខែ​តុលា​ ក្រុម​សមាជិក​សភា​អាស៊ាន​ ដើម្បី​សិទ្ធិ​មនុស្ស​ (ASEAN Parliamentarians for Human Rights)​ ​ហៅកាត់​ថា APHR​ ​បាន​ថ្កោល​ទោស​ ការ​វិវត្ត​ចុង​ក្រោយ​នៃ​ស្ថានភាព​នយោបាយ​នៅ​កម្ពុជា​ ថា​ជា​ការ​នាំ​យក​កម្ពុជា​ទៅ​កាន់​ការ​ដឹកនាំ​បែប​ឯកបក្ស​ ដែល​ផ្ទុយ​ពី​គោលការណ៍​លទ្ធិ​ប្រជាធិប​តេយ្យ​ទាំង​ស្រុង៕

Source link

លោក​ ហ៊ុន សែន ​ប្រាប់​អគ្គលេខា​ធិការ​ UN​ ​អំពី​គ្រាប់​បែក​គីមី


ខណៈ​ប្រទេស​ចិន​បាន​ប្រកាស​ថា​ជួយ​កម្ពុជា​ក្នុង​ការ​ដោះ​គ្រាប់​មិន​ទាន់​ផ្ទុះ​ នាយក​រដ្ឋ​មន្ត្រី​ខ្មែរ​លោក​ ​ហ៊ុន សែន​ ​បាន​រាយការណ៍​ដល់​អគ្គលេខាធិការ​អង្គការ​សហប្រជាជាតិ​លោកអាន់ តូញ៉ូ ហ្គុយ​តេរេស ​(Antonio Guterres)​ ​ថា​ ​ប្រទេសកម្ពុជា​ ​បាន​រក​ឃើញ​គ្រាប់​បែក​គីមី​ ដែល​សហរដ្ឋ​អាមេរិក​បាន​ទម្លាក់ក្នុង​ចុង​ទសវត្សរ៍​១៩៦០​ និង​ដើម​ទសវត្សរ៍​១៩៧០។​ ​នេះ​បើយោង​តាម​សារ​ជូន​ដំណឹង​មួយ​ដែល​បង្ហោះលើ​ទំព័រហ្វេសប៊ុក​របស់​លោក​ ហ៊ុន សែន​ កាល​ពីថ្ងៃ​អង្គារ។​

សារ​ជូនដំណឹង​លើ​ទំព័រ​ហ្វេសប៊ុក​លោក​ ហ៊ុន​ សែន​ បាន​បញ្ជាក់​ឲ្យដឹង​ក្នុង​ន័យដើម​ថា៖ «​ថ្មីៗ​នេះ​កម្ពុជា​បាន​រក​ឃើញ​នូវ​គ្រាប់​បែក​គីមី​ក្នុង​ទឹកដី​កម្ពុជា ដែល​អាមេរិក​ទម្លាក់​ចុង​ទស្សវត្ស​ទី៦០ និង​ដើម​ទស្សវត្ស៧០ ដែល​រយៈពេល​ប្រមាណ​៤០ឆ្នាំ​នេះ ពលរដ្ឋ​កម្ពុជា​បាន និង​កំពុង​រង​គ្រោះ​ដោយ​ឥទ្ធិពល​របស់វា»។

លោក​ ហ៊ុន សែន​ ​បាន​លើក​ឡើង​ថា ​កម្ពុជា​ក៏​បាន​ធ្វើ​លិខិត​ផ្លូវ​ការ​បញ្ជូន​ទៅ​កាន់​អង្គការ​អន្តរជាតិ​ផ្នែក​អាវុធ​គីមី ​ហើយ​ដើម្បី​ជួយ​កម្ពុជា។​

អគ្គលេខាធិការ​អង្គការ​សហប្រជាជាតិ​លោក អាន់តូញ៉ូ ហ្គុយតេរេស​ មិន​បាន​ឆ្លើយ​តប​ទៅ​នឹង​បញ្ហា​នៃ​ការ​រក​ឃើញ​អាវុធគីមី​របស់​អាមេរិក​នោះ​ទេ ប៉ុន្តែ​បាន​ឆ្លើយ​តប​នឹង​ការ​ដោះគ្រាប់មីន ​និង​យុទ្ធភណ្ឌ​មិន​ទាន់​ផ្ទុះ​ជា​ទូទៅ។ នេះ​បើតាម​សេចក្តី​ថ្លែង​ការណ៍​របស់​ការិយាល័យលោក​អគ្គលេខាធិការ​អង្គការ​សហប្រជាជាតិ។

កិច្ច​សន្ទនា​គ្នា​រវាង​លោក​នាយក​រដ្ឋ​មន្ត្រី​ ​ហ៊ុន សែន​ ​និង​អគ្គលេខាធិការ​អង្គការ​សហ​ប្រជាជាតិ​ ​កើត​មាន​ឡើង​មួយថ្ងៃ​ក្រោយ​ជំនួប​ទេ្វភាគីរបស់​លោក​ ​ហ៊ុន សែន​ ​ជាមួយ​នាយក​រដ្ឋមន្ត្រី​ចិន​ លោក​ ​លី ខឺ​ឈាង​ ​(Li Keqiang)​ ​នៅ​ក្នុង​ប្រទេស​ហ្វីលីពីន​ ដែល​បាន​ធ្វើ​ជាម្ចាស់​ផ្ទះនៃ​កិច្ច​ប្រជុំ​កំពូល​អាស៊ាន​ឆ្នាំ​២០១៧នេះ។ ​លោក​ ​លី​ ​បានថ្លែង​ថា​ការ​ដោះមីន​ ​និង​យុទ្ធភ័ណ្ឌ​មិន​ទាន់​ផ្ទុះ​ជា​សកម្ម​ភាព​អាទិភាព​ដ៏​សំខាន់មួយ​របស់​រដ្ឋាភិបាល​ចិន​ ​ក្នុង​ការ​ជួយ​ប្រទេស​នា​នា​ ​ដែល​កំពុង​ជួប​ប្រទះ​នូវ​បញ្ហា​នេះ។​ នេះ​បើ​យោង​តាម​សារ​ជូនដំណឹង​ដែល​បង្ហោះលើ​ទំព័រ​ហ្វេសប៊ុក​លោក​ ​ហ៊ុន សែន​ ​កាលពី​ថ្ងៃ​ទី​១៣​ ខែវិច្ឆិកា ឆ្នាំ​២០១៧។​

ទំព័រ​ហ្វេសប៊ុក​របស់​លោក​ ហ៊ុន សែន​ បាន​បញ្ជាក់​អំពី​ជំហរ​ចិន​ក្នុង​បញ្ហា​គ្រាប់​មិន​ទាន់​ផ្ទុះ​នេះ តាម​ន័យ​ដើម​ថា៖ «​មិត្ត​ចិន​សន្យា​ថា​ នឹង​ជួយ​ឱ្យ​អស់​លទ្ធភាព​ដើម្បី​បោស​សម្អាត​មីន​និង​យុទ្ធភ័ណ្ឌ មិនទាន់​ផ្ទុះ​ឱ្យ​បាន​ឆាប់រហ័ស​ និងស្នើឱ្យស្ថាប័ន​ពាក់ព័ន្ធ​នៃ​ប្រទេស​ទាំងពីរធ្វើ​ការ​ពិភាក្សា​លើ​ទិដ្ឋភាព​ជាក់ស្តែង ​ហើយ​ដាក់​ជូន​ថ្នាក់​ដឹកនាំ​ទាំងពីរ​ពិនិត្យ​និង​សម្រេច​ឱ្យ​បាន​មុន​ពេល​ទស្សនកិច្ច​ផ្លូវការ​របស់​ឯកឧត្តម​នាយក​រដ្ឋ​មន្រ្តី​ចិន​នៅ​កម្ពុជា​នាពេល​ខាងមុខ​នេះ»។

VOA ព្យាយាម​សុំការ​អធិប្បាយ​ពី​អ្នក​នាំពាក្យ​ស្ថាន​ទូត​ចិន​ប្រចាំ​នៅ​កម្ពុជា​ តែ​មិន​ទាន់​អាច​ទាក់​ទង​បាន​មក​ដល់​រសៀល​ថ្ងៃ​ពុធនេះ។

​នៅ​ដើម​ខែ​នេះ​ ​សហរដ្ឋ​អាមេរិក​បាន​បញ្ជាក់​ថា​ ​សហរដ្ឋ​អាមេរិក​នឹង​បញ្ចប់​ជំនួយ​សម្រាប់​ប្រតិបត្តិការដោះ​មីន​នៅ​កម្ពុជា​ទៅ​ឱ្យ​មជ្ឈ​មណ្ឌល​សកម្មភាព​កម្ចាត់​មីន​កម្ពុជា​ ​(CMAC)​ ​ត្រឹម​ឆ្នាំ​២០១៧​ ក៏​ប៉ុន្តែ​នឹង​បន្ត​ផ្តល់​ជំនួយ​ដល់​កម្ពុជា​តាម​មូលដ្ឋាន​ប្រកួត​ប្រជែង​ ​ដើម្បី​បោសសម្អាត​គ្រាប់​មិន​ទាន់​ផ្ទុះ​នេះ។

លោក​ ​D​avid Josar​ ​អ្នក​នាំពាក្យ​របស់​ស្ថានទូតអាមេរិក ​បាន​បញ្ជាក់ VOA ឲ្យ​ដឹង​តាម​សារអេឡិច​ត្រូនិក​ ឬ​ Email កាលពី​ដើម​ខែ​នេះថា​ ​សហ​រដ្ឋ​អាមេរិក​នៅ​បន្ត​ប្តេជ្ញា​យ៉ាង​ខ្លាំងក្លា​ចំពោះ​ភាព​ជា​ដៃ​គូ​របស់​អាមេរិក​ជាមួយ​ប្រជាជន​កម្ពុជា​ ​នៅ​ក្នុង​ការ​គាំទ្រ​គោលដៅ​របស់​ប្រជាជន​កម្ពុជា​ ដើម្បី​ធ្វើ​ឲ្យ​ប្រទេស​ពួក​គេ​ ​រួចផុត​ពី​ផល​ប៉ះពាល់​នៃ​គ្រាប់​មីន​នៅ​ត្រឹម​ ​២០២៥​ ​ក៏​ដូច​ជា​សម្រេច​ឲ្យ​បាន​គោលដៅ​រួម​គ្នា​របស់​អាមេរិក​នៃ​ការ​សម្អាត​គ្រាប់​មិន​ទាន់​ផ្ទុះ​ដែល​មាន​ប្រភព​ចេញ​ពី​សហរដ្ឋ​អាមេរិក។​

​VOA ​ព្យាយាម​សុំ​ការ​អធិប្បាយ​ពី​លោក​ ​ហេង រតនា​ ​អគ្គនាយក​នៃ​មជ្ឈមណ្ឌល​សកម្មភាព​កម្ចាត់​មីន​នៅ​កម្ពុជា​ ​ហៅ​កាត់​ថា​ ​ស៊ីម៉ាក់​ (CMAC) តែ​ទូរស័ព្ទ​លោក​រោទិ៍​គ្មាន​អ្នក​ទទួល។​

ទាក់​ទិន​នឹង​ការ​រាយការណ៍​របស់​កម្ពុជា​អំពី​វត្តមាន​នៃ​គ្រាប់​បែក​គីមី​នៅ​កម្ពុជា​ទៅ​កាន់​អង្គការ​សហប្រជាជាតិ លោក​ ​David Josar អ្នកនាំ​ពាក្យ​ស្ថានទូត​សហរដ្ឋ​អាមេរិក​ បាន​បញ្ជាក់​ថា​ ស្ថាន​ទូត​បាន​ដឹង​អំពី​លិខិត​របស់​រដ្ឋាភិបាល​កម្ពុជា​ ផ្ញើ​ទៅកាន់​អង្គការ​ហាម​ឃាត់​អាវុធ​គីមី ហៅកាត់​ថា OPCW។ លោក David​ ​បាន​ថ្លែងបញ្ជាក់​ក្នុង​ន័យ​ដើម​តាម​សារ​អេឡិចត្រូនិក​ថា៖​

​«យើង​ស្វាគមន៍​អ្នក​ជំនាញ​បច្ចេកទេស​របស់​ពួកគេ។​ ​ស្ថានទូត​នៅ​រក្សា​ទំនាក់​ទំនង​ជិតស្និទ្ធ​ជាមួយ​ក្រុមបេសកកម្ម​អាមេរិក​នៅ​អង្គការ​ហាម​ឃាត់​អាវុធ​គីមី ស្ថិត​ក្នុង​ទីក្រុង​ឡាអេ​ ​(The Hague)​ និង​នៅ​រដ្ឋធានី​ Washington ​សម្រាប់​ជំហាន​បន្ត​បន្ទាប់​ទៀត​ ក្នុង​ដំណើរការ​របស់អង្គការ​ហាម​ឃាត់​អាវុធ​គីមីនេះ»។

ឯកអគ្គ​រដ្ឋទូត​អាមេរិក​ប្រចាំ​កម្ពុជា​ គឺ​លោក​ ​William Heidt​ ​ធ្លាប់​បាន​បញ្ជាក់កន្លង​ទៅ​ថា​ ​រដ្ឋាភិបាល​សហ​រដ្ឋ​អាមេរិក​បាន​ចំណាយ​ថវិកា​ជាង​១៦០​លាន​ដុល្លារ​ ​ក្នុង​រយៈ​ពេលជាង​២០​ឆ្នាំ​កន្លង​ទៅ​នេះ​ ​សម្រាប់​គម្រោង​បោស​សម្អាត​គ្រាប់មីន​ ​និង​យុទ្ធភណ្ឌ​មិន​ទាន់​ផ្ទុះ​នៅ​កម្ពុជា។ ក្រៅ​ពី​នេះ​ ​រដ្ឋា​ភិបាល​អាមេរិក​ក៏​បាន​ផ្តល់​ជំនួយ​ផ្សេងៗ​ទៀត​ដល់​កម្ពុជា​ ​ដោយ​ផ្តោត​លើ​វិស័យ​យោធា​ ​ពាណិជ្ជ​កម្ម​ ​កសិកម្ម​ ​សេដ្ឋកិច្ច​ ​និង​អប់រំ​ជាដើម។​

ប្រទេស​ចិន​ ក៏ត្រូវ​គេដឹងថា​ជា​ប្រទេស​ដែល​ផ្តល់​ជំនួយ​ច្រើន​សន្ធឹកសន្ធាប់​ដល់​ប្រទេស​កម្ពុជា​ខាង​សេដ្ឋកិច្ច​ និង​យោធា។

ក្នុង​ជំនួបថ្មីៗ​រវាង​លោក​ ហ៊ុន សែន​ និង​នាយក​រដ្ឋមន្ត្រី​ចិន​ លោក​ ​លី ខឺ​ឈាង (Li Keqiang)​ នៅ​ក្រៅ​កិច្ច​ប្រជុំ​កំពូលអាស៊ាន​ ក្នុង​ទីក្រុង​ម៉ានីល ប្រទេស​ហ្វីលីពីន ភាគី​ចិន​បាន​សន្យា​ថា​នឹង​ខិតខំប្រឹង​ប្រែង​ឱ្យ​អស់ពី​សមត្ថភាព​ក្នុង​ការ​ជួយ​ជំរុញ​ឱ្យ​មាន​ការកសាង​ផ្លូវ​ល្បឿន​លឿន​ភ្នំពេញ​-​ក្រុង​ព្រះ​សីហនុ ដែល​ជា​ផ្លូវ​សេដ្ឋកិច្ច​ដ៏​សំខាន់​មួយ​នៅ​កម្ពុជា។​ ភាគីចិន​សន្យា​ថា​ ខ្លួននឹងធ្វើ​ឲ្យ​ការ​កសាង​ផ្លូវនេះ​ បាន​សម្រច​ឆាប់​រហ័ស​ ដើម្បី​ចូលរួម​វិភាគទាន​ជំរុញ​កំណើន​សេដ្ឋកិច្ច​ និង​លើក​តម្កើង​ជីវភាព​រស់​នៅ​របស់​ប្រជាជន​កម្ពុជា។​ នេះ​បើយោង​តាម​សារ​ជូនដំណឹង​ដែល​បង្ហោះ​លើ​ទំព័រហ្វេស​ប៊ុក​លោក​ ​ហ៊ុន សែន​ ​កាលពី​ថ្ងៃច័ន្ទ​កន្លងទៅ។​

អ្នក​វិភាគ​បានសង្ស័យ​ថា​ ការ​សើរើ​បញ្ហា​គ្រាប់​បែក​ ​ឬ​អាវុធគីមី​នៅពេល​នេះ​ ​គឺ​មាន​ការ​ជាប់​ទាក់​ទិនបញ្ហា​នយោបាយ​នៅ​កម្ពុជា​ ​និង​បញ្ហារកាំ​រកូស​នៃ​ចំណង​ការ​ទូត​កម្ពុជា ​អាមេរិក ដែល​មិន​ព្រម​ទម្លាក់​ចោល​បំណុល​រាប់​រយលាន​ដុល្លារ​អាមេរិក​ ដែល​រដ្ឋាភិបាល​កម្ពុជា បាន​ជំពាក់​ខ្លួន​ក្នុង​របប​សាធារណ​រដ្ឋដឹកនាំ​ដោយ​លោក​សេនា​ប្រមុខ​ លន់ នល់៕

Source link

ឈ្មួញ​ឈ្មោះ ដុស បន្ត​ជួញដូរ​ឈើ​គ្រញូង​យ៉ាង​គឃ្លើន​នៅ​ខេត្តឧត្ដរមានជ័យ

​លោក ស ថា​វី អភិបាលខេត្ត​ឧត្ដរមានជ័យ និង​លោក អ៊ឹម សា​វរិ​ទ្ធ នាយ​ខណ្ឌ​រដ្ឋបាល​ព្រៃឈើ​ខេត្តឧត្ដរមានជ័យ ត្រូវ​ប្រជាពលរដ្ឋ​និង​មន្ត្រីរាជការ​ក្នុង​ខេត្ត​នេះ​រិះគន់ថា គ្មាន​ឆន្ទៈ​ក្នុងការ​បង្ក្រាប​បទឧក្រិដ្ឋ​ជួញដូរ​ឈើ​ប្រណីត​ខុសច្បាប់​ដែល​កំពុង​កើតឡើង​យ៉ាង​រាលដាល​នោះទេ​។ ជាក់ស្ដែង​មន្ត្រី​យោធា​ម្នាក់​ដែល​បម្រើការ​នៅ​អង្គភាព​កងពល​តូ​ចលេ​ខ​៤២​ឈ្មោះ ដុស នៅតែ​ធ្វើ​សកម្មភាព​ជួញដូរ​ឈើ​គ្រញូង​យ៉ាង​គឃ្លើន​ដដែល​ដោយ​គ្មាន​សមត្ថកិច្ច​ឬ​មន្ត្រី​ជំនាញ​ពាក់ព័ន្ធ​ណា​ចាត់វិធានការ​ទប់ស្កាត់​ឡើយ​។ លោក អ៊ឹម សា​វរិ​ទ្ធ មេ​រដ្ឋបាល​ព្រៃឈើ​ខេត្តឧត្ដរមានជ័យ ត្រូវ​មជ្ឈដ្ឋាន​នានា​សង្ស័យថា​ទទួលផល​ប្រយោជន៍​ពី​ក្រុម​ឈ្មួញ​ជួញដូរ​ឈើ​គ្រញូង​ខុសច្បាប់​ទើប​បណ្ដោយ​ឲ្យ​បទល្មើស​បន្ត​កើតមាន​យ៉ាង​រាលដាល​ក្នុង​ទឹកដី​ខេត្តឧត្ដរមានជ័យ​។

ប្រភពពី​មន្ត្រី​យោធា​ក្នុង​កងពលតូច​លេខ​៤២​បាន​ឲ្យ​ដឹងថា ឈ្មោះ ដុស គឺជា​ឈ្មួញ​ជំរុញ​ឲ្យ​ពលរដ្ឋ​ខ្មែរ​ឆ្លងដែន​ខុសច្បាប់​ចូល​កាប់​ឈើ​គ្រញូង​លើទឹក​ដី​សៀម​យកមក​លក់​ឲ្យ​ខ្លួន​នៅតាម​ព្រំដែន ហើយ​ពលរដ្ឋ​ខ្មែរ​មួយចំនួន​ត្រូវ​សមត្ថកិច្ច​សៀម​ចាប់ខ្លួន​ជា​បន្តបន្ទាប់​។ ប្រភព​បាន​ឲ្យ​ដឹង​ទៀតថា​ឈ្មួញ​ឈ្មោះ ដុស ឈរជើង​ចាំ​ទិញ​ឈើ​គ្រញូង​នៅ​ចំណុច​បង្គោល​សីមា​លេខ​១៣​ទិស​ទី​៣ ក្នុងភូមិ​ដងទង់ សង្កាត់​កូន​ក្រៀល ក្រុង​សំរោង ខេត្តឧត្ដរមានជ័យ​។ មន្ត្រី​យោធា​ក្នុង​ខេត្តឧត្ដរមានជ័យ មួយចំនួន​បាន​បង្ហើប​ឲ្យ​ដឹងថា​ការដែល​ឈ្មួញ​ជា​មន្ត្រី​យោធា​ឈ្មោះ ដុស ហ៊ាន​ធ្វើ​អ្វីៗ​តាម​អំពើ​ចិត្ត​គឺមាន​ការឃុបឃិត​ពី​លោក​ឧ​ត្ត​ម​សេនីយ៍​ទោ ប៉ែន វ៉ូ​យ មេបញ្ជាការ​កងពលតូច​លេខ​៤២​ផងដែរ​។ ប្រភព​បាន​ឲ្យ​ដឹង​ទៀតថា​លោក ប៉ែន វ៉ូ​យ នៅ​ពី​ក្រោយខ្នង​ឈ្មួញ​ឈ្មោះ ដុស ជាច្រើន​ឆ្នាំ​មកហើយ​ដើម្បី​ជា​ថ្នូរ​នឹង​ផលប្រយោជន៍​យ៉ាង​សុខ​ស្រួល​។

មន្ត្រី​យោធា​ក្នុង​កងពលតូច​លេខ​៤២​បាន​ឲ្យ​ដឹង​ទៀតថា មន្ត្រី​ជំនាញ និង​សមត្ថកិច្ច​ពាក់ព័ន្ធ​ច្រើន​ស្ថាប័ន​ក្នុង​ខេត្តឧត្ដរមានជ័យ ទទួលផល​ប្រយោជន៍​ជាប្រចាំ​ពី​ឈ្មួញ​ឈ្មោះ ដុស ទើប​បណ្ដោយ​ឲ្យ​ឈ្មួញ​ម្នាក់នេះ​ប្រមូល​ទិញ​ឈើ​គ្រញូង​និង​ដឹកជញ្ជូន​ឈើ​គ្រញូង​ចេញពី​ខេត្តឧត្ដរមានជ័យ យ៉ាង​ពេញបន្ទុក​។ ប្រភព​ដែល​ស្និទ្ធ​នឹង​ឈ្មួញ​ឈ្មោះ ដុស បាន​ឲ្យ​ដឹងថា​ឈ្មួញ​រូបនេះ​មិន​ត្រឹមតែ​ជួញដូរ​ឈើ​គ្រញូង​ក្នុង​ខេត្តឧត្ដរមានជ័យ​ប៉ុណ្ណោះ​ទេ គឺអាច​ដឹកជញ្ជូន​ឈើ​គ្រញូង​ចេញទៅ​ស្រុក​យួន​តាម​តំបន់​ព្រំដែន​ក្នុង​ខេត្តស្វាយរៀង ទៀតផង​ដោយមាន​ការជួយ​សម្រប​សម្រួល​ពី​មន្ត្រី​ជំនាញ​និង​សមត្ថកិច្ច​នៅតាម​ដងផ្លូវ​។ ប្រការនេះ​បានបង្ហាញ​យ៉ាងច្បាស់​ថា បទបញ្ជា​របស់លោក​នាយ​ក​រដ្ឋមន្ត្រី ហ៊ុន សែន កំពុង​ក្លាយទៅជា​រឿង​ឥតន័យ​ព្រោះ​ឈ្មួញ​ជា​មន្ត្រី​យោធា​ឈ្មោះ ដុស អាច​ប្រមូល​ទិញ​ឈើ​គ្រញូង​នៅ​ខេត្តឧត្ដរមានជ័យ ហើយ​ដឹកជញ្ជូន​ទៅ​លក់​ឲ្យ​ឈ្មួញ​យួន​តាម​ព្រំដែន​ក្នុង​ខេត្តស្វាយរៀង យ៉ាង​រលូន​គ្មាន​សមត្ថកិច្ច​ណា​បង្ក្រាប​ឡើយ​៕

23634955_385220641898902_1394164572_n 23634578_385220665232233_927204811_n 23635529_385220725232227_1433442823_n

Source link